İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 288 Hüküm no: 257 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mustafa’nın kız kardeşi Fatıma’ya olan borcunu ödemesi ve kız kardeşi Fatıma’nın da oturduğu evi kardeşi Derviş’e teslim etmesi hususunda tenbihte bulunulması Sulehâya meşrûta menzil, Ma‘rûz Sâhib-i arzuhâl Derviş Mustafa b. Halil nâm kimesne meclis-i şer‘-i münîrde kız karındaşı derûn-ı arzuhâlde mezkûretü’l-ism zâtı mu‘arrefe Fatıma Hatun mahzarında mezbûre Fatıma Hatun’un sadrî oğlu es-Seyyid Hüseyin b. es-Seyyid Mehmed hâzır olduğu hâlde nezâret-i dâ‘îlerinde âsûde evkāfdan İstanbul’da Seydi Ömer mahallesinde vâki‘ süknâsı re’y-i hâkimü’ş-şer‘le sulehâya meşrûta olan bir bâb menzil bâ-hüccet mutasarrıf ve derûnunda sâkine olan Usturacı Ali Halîfe bin iki yüz on üç senesinde İstanbul kādısı efendi hazretleri huzûrunda menzil-i mezkûrdan keff-i yed ve bana tevcîh olunmasını istid‘â eylediğine binâen işbu yedimde olan hüccet-i şer‘iye mûcebince izn-i hâkimü’ş-şer‘le bana tevcîh olundukdan sonra ben dahi kız karındaşım mezbûre Fatıma Hatun’dan yüz on guruş iktirâz ve kabz ve merkūm Ali Halîfe’ye teberru‘an def‘ ü teslîm ve menzil-i mezkûrda rızâmla kız karındaşım mezbûre ile oğlu hâzır-ı merkūmu iskân eylediğimden sonra meblağ-ı merkūm yüz on guruşu kız karındaşım mezbûreye bundan akdem tamamen edâ ve teslîm etmemle hâlâ menzil-i mezkûrdan hurûc birle bana teslîme kız karındaşım mezbûreye tenbîh olunmak matlûbumdur deyü ba‘de’d-da‘vâ ve’l-istintâk mezbûre Fatıma Hatun cevâbında menzil-i mezkûr tevcîh-i hâkimü’ş-şer‘le bâ-hüccet müdde‘î-i mezbûr Derviş Mustafa’nın taht-ı tasarrufunda olup kendüleri âriyet tarîkiyle sâkinler olduklarını ikrâr lâkin meblağ-ı merkūm yüz on guruşu kabzını inkâr etmekle müdde‘î-i mezbûr meblağ-ı merkūm yüz on guruşu edâ ve teslîmini isbâta kādir olmayıp bi’t-taleb mezbûre Fatıma Hatun bi’l-muvâcehe ber-nehc-i şer‘î tahlîf olunmağın mûcebince meblağ-ı merkūm yüz on guruşu mezbûre Fatıma Hatun’a edâ ve teslîme mezbûr Derviş Mustafa’ya ve menzil-i merkūmdan hurûc birle müdde‘î-i mezbûr Derviş Mustafa’ya teslîme mezbûre Fatıma Hatun’dan her birine tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 4 Ra sene 1223.