İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 289 Hüküm no: 259 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe ile Hasan Usta’nın çörekçi fırınını nöbetleşe kullanmaları Nadiye’de Çörekçi fırını Ma‘rûz Mehmed Beşe b. Hüseyin nâm kimesne meclis-i şer‘-i münîrde çörekçi esnâfından Hasan Usta b. Mustafa nâm kimesne mahzarında İstanbul’da Şehremîni kurbünde Nadiye nâm mahâlde hamam karşısında kâin bir bâb çörekçi fırını derûnunda ma‘lûm beyne’l-hıref gedik ta‘bîr olunur âlât-ı lâzıme-i ma‘lûmenin nısf-ı şâyi‘i benim ve nısf-ı şâyi‘-i âharı mezbûr Hasan Usta’nın yedimizde iştirâken ve şâyi‘an mülk ve hakkımız olup lâkin işbu târihe gelince on sekiz seneden beri mezbûr Hasan Usta fırın-ı mezkûrda sâkin ve âlât-ı lâzıme-i merkūmeyi müstakıllen tasarruf etmekle âlât-ı lâzıme-i mezkûreyi muhâyât tarîkiyle evvelâ ben ve sâniyen mezbûr Hasan Usta tasarruf etmek üzere tenbîh olunmak matlûbumdur deyü esnâf-ı mezbûre Kethudâsı Ahmed Ağa ve Yiğitbaşısı Ahmed Usta ile bi’l-cümle ustalar hâzır oldukları hâlde da‘vâ etdikde ol dahi cevâbında bi-tamamihi ikrâr ü i‘tirâf ve işbu târih-i i‘lâm-ı şehrînin dokuzuncu günü Rûz-ı Hızır olmağla yevm-i mezkûrdan i‘tibâr ile âlât-ı mezkûreyi müdde‘î-i merkūm Mehmed Beşe’ye teslîme ta‘ahhüd ve ol-vechile evvelen bir sene müdde‘î-i mezbûr ve sâniyen bir sene merkūm Hasan Usta tasarruf edip ahadühümâ âharın zamanına ta‘arruz etmemek üzere her biri müte‘ahhid oldukları İstanbul Mahkemesi’nden huzûr-ı [âlîlerine i‘lâm olundu.] Fî 5 Ra sene 1223.