İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 290 Hüküm no: 260 Orijinal metin no: [34b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said’in Kadırga Limanı Çarşısı’ndaki tütüncü dükkânı gediğini Hüseyin Çavuş’a satması Kadırga Limanı’nda tütüncü Ma‘rûz Hâmiş-i arzuhâlde mastûr derkenâr nâtık olduğu üzere İstanbul’da Kadırga Limanı çarşısında kâin Ma‘den Kalemi’nde Mehmed Said b. Hasan dükkânı demekle arîf mu‘teber ve mukayyed bir bâb duhâncı dükkânı derûnunda mevcûde beyne’l-hıref gedik ta‘bîr olunur bâ-defter-i müfredât âlât-ı lâzıme-i ma‘lûmeye mâlik olan sâhib-i arzuhâl mezbûr Mehmed Said meclis-i şer‘-i münîrde Dîvânhâne çavuşlarından bâ‘isü’l-i‘lâm Hüseyin Çavuş b. el-Hâc Osman mahzarında tütüncüler kethudâsı İbrahim Ağa ve Yiğitbaşı es-Seyyid Abdullah ve esnâfından mazbûtü’l-esâmî kimesneler hâzır oldukları hâlde takrîr-i kelâm edip bâlâda mezkûr duhâncı dükkânı derûnunda [35a] mevcûde mukayyed ve mu‘teber gedik âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bin guruş semen-i makbûza mezbûr Hüseyin Çavuş’a esnâf-ı merkūme ma‘rifetiyle bey‘ ve temlik ve teslîm ol dahi iştirâ ve temellük ve tesellüm ve kabûl edip mebî‘-i mezkûrun takrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve iskāt eyledik, fîmâ-ba‘d sâlifü’l-beyân gedik ta‘bîr olunan âlât-ı lâzımede benim kat‘a alâka ve medhalim kalmayıp mezbûr Hüseyin Çavuş’un mülk-i müşterâsı olmuşdur deyü ba‘de’l-ikrâr ve’t-tasdîk gedik-i mezkûr Ma‘den Kalemi’nde mezbûr Mehmed Said ismine mukayyed olmağla kaydı mahâllinden ref‘ ve terkīn ve müşteri-yi merkūm Hüseyin Çavuş ismi tasrîhiyle kayd olunup zabt ve tasarrufunu nâtık yedine sûret i‘tâ olunması bâbında istid‘â-yı inâyet eylediği İstanbul Mahkemesi’nden huzûr-ı [âlîlerine i‘lâm olundu.] Fî 9 Ra sene 1223.