İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 290 Hüküm no: 261 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolabçı denilen ipek bükücü esnafının kethudaları ve yiğitbaşısı Mehmed Said ve Ahmed’in azledilerek yerlerine Mustafa Ağa’nın tayin olunması Harîr bükücü esnâfına kethudâ ve yiğitbaşı nasbı Ma‘rûz Âsitâne-i aliyye’de vâki‘ dolabçı ta‘bîr olunur harîr bükücü esnâfının müsinn ü ihtiyârlarından ashâb-ı arzuhâl es-Seyyid Ahmed ve Mehmed Emin ve diğer es-Seyyid Ahmed ve Hüseyin Usta ve el-Hâc Mustafa Usta ve Mahmud Usta ve es-Seyyid Numan Usta ve el-Hâc İsmail ve Süleyman ve es-Seyyid Cafer ve es-Seyyid Mehmed Ârif ve diğer Hüseyin ve Ali ve sâir bi’l-cümle dolabçı esnâfı bi’t-terâzî du‘âhânemizde ma‘kūd meclis-i şer‘-i münîrde Kazzâzlar Kethudâsı Mustafa Ağa hâzır olduğu hâlde derûn-ı arzuhâlde mezkûreyi’l-ism esnâf-ı mezbûre kethudâsı olan Mehmed Said ve Yiğitbaşı Ahmed nâm kimesneler muvâcehelerinde merkūmân esnâfımızın kethudâ ve yiğitbaşısı olup lâkin tama‘-ı hâmlarından nâşi her birilerimizi tecrîm ve tağrîm ve gadr-ı küllî ve birer bahâne ile kimimizi kal‘aya vaz‘ ve kimimizi Orta çavuşlar ile tedîb etdirdiğinden mâ‘adâ muhill-i nizâm-ı kadîmimiz olan harekât-ı nâ-marzıyeleri şirâze-i nizâmımızın ihtilâline bâ‘is ü bâdî ve hıyel-i şettâ ile cümlemizi perâkende vü perîşân ve merkūmânın bu misillü harekâtları cümlemizin harâb olmamıza sebeb olmağla merkūmânın zulm ü te‘addîlerinden masûn olmamız için azl ve esnâfımızdan ihrâc olunup umûrumuzu hâzır-ı merkūm Mustafa Ağa kadîmî üzere idâre ve rü’yet etmesini iltimâs ederiz dediklerinde merkūmân Mehmed Said ve Ahmed’in azl ve esnâfdan ihrâcı ve merkūm Mustafa Ağa’nın kadîmî üzere umûr ve husûsu kemâ-yenbagī idâre ve rü’yet eylemesi tarafeynden her birine tefhîm olunduğu İstanbul Mahkemesi’nden huzûr-ı [âlîlerine i‘lâm olundu.] Fî 7 Ra sene 1223.