İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 291 Hüküm no: 262 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papuçcu esnafından Artin, Mardıros ve Kostantin’in kürek cezası ile cezalandırılmaları Terlikçi esnâfından vaz‘-ı kürek Ma‘rûz Ashâb-ı arzuhâl Âsitâne-i aliyye’de Mercan Çarşısı’nda vâki‘ kırmızı terlikçi esnâfının kethudâsı el-Hâc Ömer ve Yiğitbaşısı Ahmed ve ustalarından Ahmed ve İsmail ve sâirleri ile Dârü’s-sa‘âdeti’ş-şerîfe Ağası nezâretlerinde âsûde evkāfdan Hudâvendigâr-ı sâbık vâlidesi merhûme ve mağfûrun-lehâ Mihrişah Sultan -tâbe serâhâ- evkāfından İstanbul’da Vefa Hanı demekle arîf bir bâb handa beher şehr iki yüz guruş icâre-i vâhide ile müstecir olup re‘âyânın giydikleri siyâh ve kırmızı ve lök sahtiyândan pabûş i‘mâli kendülere mahsûs olan dikici esnâfının yiğitbaşıları Bogos ve ustalarından Minas ve İstefan ve Haçador ve Serkiz ve Anton ve Rafael ve sâir bi’l-cümle altmış nefer ustalar ve yine vakf-ı müşârün-ileyhâ musakkafâtından İstanbul’da Dülbendçi mahallesinde kâin bir bâb handa beher şehr yüz yirmi iki guruş icâre-i vâhide ile müstecir olup kezâlik re‘âyânın giydikleri kırmızı mest ve çedik ve terlik i‘mâli kendülere münhasır olan dikici esnâfının yiğitbaşıları Gabril ve ustalarından Avanes ve Avak ve Kirkor ve diğer Avanes ve Kostantin ve Mıgırdıç ve Mardıros ve Kigork ve sâir bi’l-cümle yirmi nefer ustalar meclis-i şer‘-i hatîrde Âsitâne-i aliyyede vâki‘ sarı pabûş tasnî‘ eder esnâfdan derûn-ı arzuhâlde isimleri mastûr Artin v. Salamon ve Mardıros v. Karabet ve Kostantin v. Panayot nâm zimmîler muvâcehelerinde işbu yedimizde olup bâlâları mübârek hatt-ı hümâyûn-ı şevket-makrûn ile müzeyyen evâmir-i aliyye-i mütekaddime mantûklarınca siyâh ve kırmızı ve lök sahtiyândan pabûş i‘mâli zikr olunan Vefa Hanı’nda altmış nefer dikici esnâfına ve kezâlik kırmızı ve bakkām ve siyâh ve lök sahtiyândan mest ve çedik ve terlik i‘mâli sâlifü’l-beyân Dülbendci mahallesinde kâin hân-ı mezkûrda ber-vech-i meşrûh müstecir ve mütemekkin olan yirmi nefer mestçi esnâfına mahsûs olup bizler sarı mest ve pabûş ve çedik ve terlik i‘mâl ve tasnî‘ etmeyip ve sarı mest pabûş ve dikici esnâfı dahi bizim metâ‘-ı mahsûsamızı işlemeyip şurût-ı mezkûremize ri‘âyet ve her birimiz san‘atımıza kanâ‘at üzere iken sarı pabûş i‘mâl eden dikici esnâfı kendi emti‘alarına kanâ‘at etmeyip hilâf-ı hatt-ı hümâyûn bizim i‘mâl eylediğimiz emti‘amızı i‘mâl ile şurût-ı nizâmımız muhtel ve müşevveş olmasına bâ‘is ü bâdî olduğuna binâen bi’d-defa‘ât sarı pabûş ve mest dikici esnâfı ile huzûr-ı şer‘de mürâfa‘a ve kaza[yayı] mübeyyin? evâmir-i münîfe kendülere tefhîm olundukda onlar dahi ba‘de’l-yevm kırmızı ve bakkām ve siyâh ve lök sahtiyândan mest ve pabûş i‘mâl etmemeğe ta‘ahhüd ve eğer hilâf-ı ta‘ahhüd tasnî‘ eder isek vaz‘-ı kürek ile tedîbe râzılar olmuş iken mersûmûn Artin ve Mardıros ve Kostantin zimmîler kendi hâllerinde ırzlarıyla mukayyed olmayıp her birileri gelir bizden ellişer yüzer guruş mutâlebe, eğer vermez iseniz sizlere ifk ü iftirâ ederiz deyüp ve bi’d-defa‘ât rikâb-ı hümâyûna ve Bâb-ı âlî’ye arzuhâl takdîmiyle bizleri ta‘cîz ve tekdîrden hâlî olmamalarıyla mersûmûn Artin ve Mardıros ve Kostantin zimmîler vaz‘-ı kürek ile tedîb olunup ve ıslâh-ı nefs olunduklarında fîmâ-ba‘d ırz ve edebleriyle meşgūl olmalarına kefîl vermedikçe sebîlleri tahliye olunmamaları için muvâcehelerinde iştikâ ve mersûmûnun vaz‘-ı kürek birle tedîblerini iltimâs eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 9 Ra sene 1223.