İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 296 Hüküm no: 265 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe, Molla Ali ve Zeynep Hatun’un tasarruflarında olan Hacı Hasan dükkânındaki pirinçci ve zahireci gediğinin kaleme kaydedilmesi Balıkpazarı’nda peynirci ve zahîreci Ma‘rûz İşbu istid‘âya nazar-birle muktezâsını i‘lâm eyleyesin deyü bu dâ‘îlerine hitâben sâdır olan fermân-ı âlîlerine imtisâlen arzuhâle nazar olundukda İstanbul’da Balıkpazarı hâricinde Gümrük mukābilinde berber dükkânları karşısında kasab dükkânı sırasında kâin bir tarafdan Peynirci İbiş Ağa dükkânı ve bir tarafdan Hasırcı Molla Ali dükkânı ve bir tarafdan Vâlide Câmi‘-i şerîfi duvarı ve bir tarafdan tarîk-i âm ile mahdûd Hacı Hasan dükkânı demekle meşhûr bir bâb pirinçci ve zahîreci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla ashâb-ı arzuhâl otuz sehmi Hüseyin Beşe b. Mustafa’nın ve otuz sehmi Molla Ali b. Osman’ın ve altmış sehmi Zeyneb Hatun bt. Süleyman’ın yedlerinde bâ-hüccet şirâen [ve] iştirâken ve şâyi‘an mülkleri olup işbu dükkân-ı mezkûr derûnunda mevcûde gedik ez-kadîm esnâf beynlerinde pirinçci ve zahîreci gediği olarak mer‘î ve mukayyed olup dükkân-ı mezkûrda bey‘ eyledikleri erzâk bakkāl metâ‘ı olmağla bakkāl ve sabuncu ve pirinçci gedikleri misillü emvâl-i tüccâra mu‘âdil ve mâl-ı tüccârı muhâfaza lâzıme-i hâlden olmağla gedik ashâbından biri müflisen firâr veyâhûd fevt oldukda gedikleri bey‘ olunup düyûnu var ise dâyinlerine edâ olunup düyûnu yoğise veresesine irs-i şer‘le mîrâs olunup bu sûretde tüccâr dahi emvâlinin telef ve zâyi‘ olmayacağını mülâhaza birle i‘timâd-ı küllî tahsîl ve mâllarını ashâb-ı gedikden dirîğ etmeyip ve bu vechile ibâdullâha menâfi‘-i vefîre hâsıl olacağı mülâhazadan ba‘îd olmağla bu misillü gedik ashâbı kirâ-yı kadîmelerini mülk mutasarrıflarına bilâ-ta‘allül mâh be-mâh edâ ve teslîm eyledikçe kirâ artırmak sevdâsıyla ihrâc veyâhûd âhar bahâne ile rencîde olunmamak şurût-ı esnâfdan olmağla merkūmûnun dahi müstecir oldukları dükkân-ı mezkûrun mülk sâhibine kirâ-yı kadîmini bilâ-ta‘allül mâh be-mâh edâ eyledikçe kirâ artırmak veyâhûd âhar bahâne ile ihrâclarına tasaddî olunmamaları için mâlik oldukları gedikleri emsâli misillü kalemine kayd ve yedlerine başka başka sûret i‘tâsını istirhâm eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 11 Ra sene 1223.