İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 298 Hüküm no: 267 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin kasap dükkânı gediklerini Ömer Ağa’ya satması Nişâncı’da kasab, Ma‘rûz Hudâvendigâr-ı esbak cennet-mekân firdevs-âşiyân Gāzi Sultan Abdülhamid Han aleyhi’r-rahmetü ve’l-gufrân hazretlerinin evkāf-ı şerîfelerinden Yedikule hâricinde kâin ganem salhânelerinden üçüncü salhâneye merbût İstanbul’da Keçeciler Hamamı kurbünde vâki‘ bir bâb ve yedinci salhâneye merbût İstanbul’da Karagümrük kurbünde Nişâncı Paşa Câmi‘-i şerîfi civârında kâin bir bâb ki cem‘an iki bâb kasab dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmeler bâ-temessük-i mütevellî mutasarrıf olan Hüseyin Beşe b. Hasan meclis-i şer‘-i münîrde Hâssa Kasabbaşı izzetlü Mustafa Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Ömer Ağa b. Cafer tarafından husûs-ı âtîde vekîl olduğu Hafız Mehmed b. Mustafa ve es-Seyyid İbrahim b. es-Seyyid Mustafa nâm kimesneler şehâdetleriyle sâbit olan es-Seyyid Ahmed b. es-Seyyid Hüseyin mahzarında takrîr-i kelâm edip ber-vech-i muharrer mâlik olduğum iki bâb kasab dükkânları derûnlarında mevcûde gedik âlât-ı lâzımelerimi hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî müvekkil-i mezbûr Ömer Ağa’ya ferâğ ve tefvîz eylediğimde ol dahi, ber-vech-i muharrer tefevvüz ve kabûl edip ba‘de’l-yevm sâlifü’z-zikr iki bâb kasab dükkânları derûnlarında mevcûde gedik âlât-ı lâzıme-i ma‘lûmeleri müvekkil-i mezbûr Ömer Ağa’nın dâhil-i havza-i tasarrufu olup benim kat‘a alâka ve medhalim kalmamışdır dedikde vekîl-i mezbûr dahi ba‘de’t-tasdîk zikr olunan gedikler fâriğ-i mezbûr Hüseyin Beşe ferâğından müvekkil-i merkūm Ömer Ağa üzerine defter-i vakf-ı şerîfe ba‘de’l-kayd zabtı için hâmiş-i temessüke tahrîr ve temhîr ve yedine i‘tâsı iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 9 Ra sene 1223.