İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 299 Hüküm no: 268 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin Seyyid Ömer Beşe aleyhindeki bakkal dükkânı gediği davasının meşru olmadığı Eskisaray kurbünde bakkāl, Ma‘rûz Bakkāl tâifesinden Osman Beşe b. Hasan nâm kimesne meclis-i şer‘-i münîrde yine tâife-i merkūmeden es-Seyyid Ömer Beşe b. es-Seyyid Mehmed nâm kimesne muvâcehesinde İstanbul’da Saray-ı atik-i ma‘mûre civârında vâki‘ Musa Ağa Dükkânı demekle ma‘rûf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla doksan sehmi benim ve otuz sehmi âharın yedimizde iştirâken ve şâyi‘an mülk ve hakkımız iken ben bin iki yüz yirmi senesi Cemâziyeâhiresinin on dördüncü günü âlât-ı lâzıme-i muharrere-i mezkûrede ber-i‘tibâr-ı merkūm mâlik olduğum doksan sehm hisse-i şâyi‘amın otuz sehmini yedimde ibkā ve mâ‘adâ altmış sehmini mezbûr es-Seyyid Ömer Beşe ile şerîki gāib ani’l-meclis es-Seyyid Feyzullah Beşe b. es-Seyyid Mehmed’e bi’l-münâsafe üçer yüz guruşdan cem‘an altı yüz guruş semen-i makbûza bâ-hüccet bey‘ ve temlik ve teslîm eylediğimde onlar dahi iştirâken iştirâ ve temellük ve tesellüm ve kabûl eylediklerinden sonra gāib-i mezbûr es-Seyyid Feyzullah Beşe mâlik olduğu ber-i‘tibâr-ı merkūm otuz sehmini bana bey‘e arz edip ben dahi şirâdan imtinâ‘ ve diyâr-ı âhara âzim olduğumda mâlik olduğu otuz sehmini iki yüz yirmi bir senesi Zilka‘desi’nin yirmi ikinci günü işbu mezbûr es-Seyyid Ömer Beşe’ye beş yüz guruş semen-i makbûza bâ-hüccet bey‘ ve temlik ve teslîm edip ol-vechile ben mukaddemâ şirâdan imtinâ‘ eylediğime nâdim ve pişman olmamla mezbûr es-Seyyid Ömer Beşe medfû‘u olan meblağ-ı merkūm beşyüz guruşunu yedimden ahz birle gedik âlât-ı lâzımesinden iştirâ eylediği ber-i‘tibâr-ı merkūm otuz sehmi bana bey‘ eylesin deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûra tefhîm ve da‘vâ-yı mezkûresiyle merkūm es-Seyyid Ömer Beşe’ye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî-gurreti Ra sene 1223.