İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 301 Hüküm no: 271 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hacı İbrahim’in Soğancı dükkânı gediğini kardeşi Hacı Ahmed Ağa ile nöbetleşe kullanmaları Odunkapısı’nda Soğancı gediği, Ma‘rûz Zâtı ta‘rîf-i şer‘î ile mu‘arrefe olan Fatıma Hatun bt. el-Hâc İbrahim meclis-i şer‘-i münîrde er karındaşı el-Hâc Ahmed Ağa muvâcehesinde İstanbul’da Odunkapısı hâricinde Soğancılar sûkunda vâki‘ Küçük Dükkân demekle ma‘rûf bir bâb soğancı dükkânı yedlerimizde olan temessük mûcebince iştirâken bi’l-icâreteyn taht-ı tasarrufumuzda ve derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin on sehm i‘tibârıyla dört sehmi benim ve altı sehmi karındaşım mezbûr el-Hâc Ahmed Ağa’nın yedimizde mülk ve hakkımız olup lâkin âlât-ı mezkûre kābil-i taksîm olmadığına binâen işbu yedimde olan i‘lâm-ı şer‘î mantûkunca bir sene ben ve on sekiz ay karındaşım mezbûr el-Hâc Ahmed Ağa muhâyât tarîkiyle zabt ve tasarrufa râzılar olup ve işbu târih-i i‘lâm günü nevbet-i tasarruf bana avdet etmekle dükkân-ı mezkûrdan hurûc ve âlât-ı lâzımeyi bana teslîme mezbûr el-Hâc Ahmed Ağa’ya tenbîh olunmak matlûbumdur deyü da‘vâ etdikde ol dahi ber-vech-i muharrer ikrâr ü i‘tirâf birle âlât-ı lâzıme-i ma‘lûmeyi müdde‘iye-i mezbûreye teslîme ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu.] Fî-gurreti Ra sene 1223.