İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 302 Hüküm no: 272 Orijinal metin no: [36a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Karabet’in Yağcı Vasil’de olan alacağının vekili vasıtasıyla tahsil olunması 200 guruş hüküm Ma‘rûz Arzuhâl eden Uncu Karabet v. Adam nâm zimmî tarafından zikri âtî meblağ-ı taleb ve da‘vâ ve ahz ü kabza vekîl olduğu el-Hâc Ebûbekir Ağa b. Mustafa ile Manuk v. İstefan zimmî şehâdetleriyle sâbit olan Artin v. Bedros zimmî meclis-i şer‘-i hatîrde derûn-ı arzuhâlde mersûmü’l-ism Yağcı Vasil v. Silyestir nâm zimmî muvâcehesinde müvekkilim mersûm Karabet zimmînin mesfûr Vasil zimmî zimmetinde işbu yedimde olan bir kıt‘a Rumiyyü’l-ibâre temessük mantûkunca cihet-i karzdan iki yüz otuz guruşdan bâkī iki yüz guruş alacak hakkı olmağla meblağ-ı bâkī-i merkūmu mesfûr Vasil zimmîden bi’l-vekâle taleb ederim deyü da‘vâ etdikde ol dahi cevâbında ber-vech-i muharrer ikrâr, lâkin ben târih-i i‘lâmdan [37a] dört sene mukaddem malımdan bir kîse derûnunda mevdû‘ adedi nâ-ma‘lûm bir mikdâr akçeyi deynim mukābilinde dayinim müvekkil-i mesfûr Karabet zimmîye verip ol dahi şerîkim olup bundan akdem kendüye iflâs târî olan gāib ani’l-meclis Yorgi zimmîye iki yüz otuz guruşu bana deynin olmak üzere zikr olunan kîseyi teslîm, gāib-i mersûm dahi ba‘de’l-ahz yine bana teslîm edip ol-vechile benim müvekkil-i mesfûre deynim kalmayıp vech-i meşrûh üzere edâ etmiş idim deyü eylediği takrîri def‘a sâlih cevâb-ı şer‘î olmamağla alâ-mûcebi i‘tirâfihî meblağ-ı bâkī-i merkūm iki yüz guruşun müvekkil-i mesfûr Karabet zimmî için müdde‘î-i vekîl-i mersûma edâ ve teslîme mesfûr Vasil zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu.] Fî 7 Ra sene 1223.