İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 303 Hüküm no: 274 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. Nikola’nın Nikoli v. Yorgi’de olan alacağını tahsil ve zimmetini ibra etmesi 100 guruş ve tüfenk teslîmi Ma‘rûz Arzuhâl eden Maryora bt. Nikola nâm Nasrâniye tarafından husûs-ı âti’l-beyânda vekîl olduğu şahsını ârifân Rizo v. Marko ve Mihail v. İstemat zimmîler şehâdetleriyle sâbit olan Yorgi v. Kostantin zimmî meclis-i şer‘-i münîrde derûn-ı arzuhâlde mersûmü’l-ism Nikoli v. Yorgi nâm zimmî muvâcehesinde müvekkilem mersûme Maryora Nasrâniye benim mesfûr Nikoli zimmî zimmetinde cihet-i karzdan üç bin guruş alacak hakkım olmağla taleb ederim deyü bundan akdem da‘vâya tasaddî etmiş idi. Lâkin da‘vâ-yı mezkûresinin kat‘a aslı olmayıp ancak müvekkilem mersûmenin mesfûr Nikoli zimmî zimmetinde bâ-temessük alacak hakkı olan yüz guruş ile kendi yedinde vedî‘a olan yüz guruşu kıymetli bir tüfengi müvekkilem mesfûre Maryora Nasrâniyeye def‘ ü teslîm, ol dahi tamamen ahz ü kabz edip bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan mersûm Nikoli zimmînin zimmetini ibrâ-yı âmm-ı sahîh-i şer‘î ile bi’l-vekâle kabûlü hâvî ibrâ ve iskāt eyledim deyü ikrâr ve tasdîkleri İstanbul Mahkemesi’nden huzûr-ı [âlilerine i‘lâm olundu.] Fî 11 Ra sene 1223.