İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 307 Hüküm no: 280 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Reis’in Çubukçu Hacı Ali aleyhinde köle davası açmaktan menedilmesi Gulâm mâddesi, Ma‘rûz Sâhib-i arzuhâl Hasan Reis b. Mehmed meclis-i şer‘-i münîrde derûn-ı arzuhâlde mezkûrü’l-ism Çubukçu esnâfından el-Hâc Ali b. Ali nâm kimesne mahzarında mezbûr el-Hâc Ali Ağa’nın târih-i i‘lâmdan üç ay mukaddem cemî‘ uyûbdan sâlim olmak üzere malından nakd otuz guruş ile işbu hâzır bi’l-meclis bir re’s Tavâşî zenci gulâmı mukābelesinde ben malımdan kezâlik işbu hâzır bi’l-meclis Çerkesiyyü’l-asl bir re’s sagīr gulâmımı mezbûr Ali Ağa’ya bi-tarîki’l-mukābaza bey‘ ve teslîm ve her birimiz âhar yedinden ahz ü kabz etmiş idik. Lâkin benim iştirâ eylediğim gulâmın selîsü’l-bevl illeti olduğundan mâ‘adâ sârik dahi olmağla ol-vechile ta‘ayyüb ve ayb-ı mezkûre şirâ târihinden kadîm ve inde’t-tüccâr noksân-ı semen îcâb eder uyûbdan olmağla makbûzum olan nakd-i merkūm ile zenci gulâm-ı mezkûru yedimden ahz birle mârrü’z-zikr gulâmımı bana redd ü teslîme mezbûr el-Hâc Ali Ağa’ya tenbîh olunmak matlûbumdur deyü teveccüh-i husûmet bulundukdan sonra da‘vâ etdikde, ol dahi cevâbında ben gulâm-ı mezbûru cemî‘ uyûbuyla müdde‘î-i mezbûr Hasan Reis’e bi-tarîki’l-mukābaza vech-i meşrûh üzere bey‘ ve teslîm etmiş idim deyü eylediği def‘ini lede’t-tezkiye adl ve makbûlü’ş-şehâde idükleri ihbâr olunan Mehmed Emin Ağa b. Ahmed ve İbrahim Ağa b. el-Hâc Ömer nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i mezbûr Hasan Reis da‘vâ-yı mezkûresiyle merkūm el-Hâc Ali Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 14 Ra sene 1223.