İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 308 Hüküm no: 281 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arab İbrahim Beşe’nin tütüncü dükkânı gediğini Halil Beşe’ye satması ve gediğin Hatice Sultan Camii altındaki dükkâna taşınması Keçeciler’de Tütüncü gediği, Ma‘rûz Hâmiş-i arzuhâlde mastûr derkenâr nâtık olduğu üzere İstanbul’da Keçeciler Hamamı kurbünde Hürrem Çavuş Câmi‘-i şerîfi karşısında kâin Ma‘den Kalemi’nde Arab İbrahim Beşe dükkânı demekle arîf mukayyed ve mu‘teber bir bâb duhâncı dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mâliki sâhib-i arzuhâl mezbûr Arab İbrahim Beşe b. Ahmed nâm kimesne meclis-i şer‘-i münîrde duhâncı esnâfının kethudâsı İbrahim Ağa ve Yiğitbaşısı es-Seyyid Abdullah ve esnâfından mazbûtü’l-esâmî kimesneler hâzır oldukları hâlde bâ‘isü’l-i‘lâm Halil Beşe b. Ahmed nâm kimesne mahzarında takrîr-i kelâm edip bâlâda mezkûr duhâncı dükkânı derûnunda mevcûde mu‘teber ve mukayyed gedik âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan otuz guruş semen-i medfû‘ ve makbûza mezbûr Halil Beşe’ye kethudâ ve bi’l-cümle esnâf-ı merkūme ma‘rifetiyle bey‘ ü temlik ve teslîm eylediğimde ol dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik ta‘bîr olunan âlât-ı lâzıme-i muharrere-i mezkûrede benim aslâ ve kat‘a alâka ve medhalim kalmayıp mezbûr Halil Beşe’nin mülk-i müşterâsı olmuşdur deyü ba‘de’l-ikrâr ve’t-tasdîk müşterî-yi mezbûr Halil Beşe Meclis-i şer‘de takrîr-i kelâm edip gediğini iştirâ eylediğim dükkân-ı mezkûrun mülk sâhibine lüzûmu olmağla gedik-i merkūm âhar dükkâna nakl olunmak şurût-ı mer‘iyeden olmağla iştirâ eylediğim âlât-ı mezkûreyi Edirnekapısı kurbünde Acıçeşme ittisâlinde Hadice Sultan Câmi‘-i şerîfi tahtında vâki‘ işbu hâzır bi’l-meclis Bezzâzistânî Hafız el-Hâc Mehmed Efendi b. Mehmed’in tasarrufunda olup şehriye dörder guruş kirâ ile müşâhereten müsteciri olduğum kimesnenin gediği olmayan bir bâb dükkâna nakl ve ber-vech-i muharrer Ma‘den kalemine kayd olunmak murâdımdır dedikde bu misillü tütüncü dükkânı mülk sâhibine lüzûmu oldukda tütüncü dükkânı gediğinin nakli şurût-ı mer‘iyelerinden olduğunu kethudâ ve yiğitbaşı ve ihtiyârları merkūmûn haber vermeleriyle mârrü’z-zikr Hürrem Çavuş Câmi‘-i şerîfi karşısında olan dükkân ba‘de’l-yevm tütüncü dükkânı olmamak şartıyla gediği zikr olunan Acıçeşme ittisâlinde Hadice Sultan Câmi‘-i şerîfi tahtında kâin hâzır-ı mezbûr Hafız el-Hâc Mehmed Efendi’nin tasarrufunda olan dükkân-ı mezkûrda mu‘teber olmak üzere dükkân-ı evvelin gedik kaydı ilkā ve Arab İbrahim Beşe üzerinden ref‘ ü terkīn ve mahâll-i sânîde müşteri-yi merkūm Halil Beşe üzerine kayd birle yedine sûret i‘tâ olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 15 Ra sene 1223.