İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 309 Hüküm no: 282 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpa ve buğday döğücü esnafından olmayan birisinin esnafa dahil olması için dört-beş sene ustanın yanında çalışması gerektiği Kapan-ı dakīkde hınta ve şa‘îr döğücü dükkânı gediği Ma‘rûz Âsitâne-i aliyye’de Müftü Hamamı kurbünde Kâtib Hüsrev mahallesinde sâkine Emine bt. el-Hâc Mehmed nâm Hatun’un zevci ve tarafından husûs-ı âtîde vekîl olduğu zâtını ârifân Hüseyin Ağa b. Halil ve Mehmed Sadık Ağa b. Abdurrahman nâm kimesneler şehâdetleriyle sâbit olan Zihgircibaşı Mehmed Ağa b. Abdullah nâm kimesne meclis-i şer‘-i münîrde Âsitâne-i aliyye’de vâki‘ dökmeci esnâfının kethudâsı Ahmed Usta ve müsinn ü ihtiyârlarından el-Hâc Ahmed usta ve Abdullah Usta ve Mustafa Usta ve sâir bi’l-cümle dökmeci esnâfı muvâcehelerinde İstanbul’da Kapan-ı dakīk hâricinde vâki‘ ma‘lûmü’l-hudûd bir bâb hınta ve şa‘îr döğücü dükkânı ittisâlinde kâin bir bâb mahzen zevcem müvekkilem mezbûre Emine Hatun ile li-ümmin karındaşı gāibetü ani’l-meclis Âişe bt. Mustafa nâm hatunun bi’l-münâsafe bâ-temessük-i mütevellî bi’l-icâreteyn taht-ı tasarruflarında ve derûnlarında mevcûd beyne’l-hıref gedik ta‘bîr olunan âlât-ı lâzıme-i ma‘lûmeleri kezâlik ale’l-iştirâki’s-seviyy irsen yedlerinde mülkleri olup lâkin zikr olunan dükkân ve mahzeni sekiz seneden beri gāibe-i mezbûre Âişe Hatun müstakılleten tasarruf etmekle ben şehr-i sâbık Saferi’l-hayrın beşinci günü meclis-i şer‘de merkūme Âişe Hatun mahzarında mârrü’l-beyân dükkân ve mahzen muhâyât tarîkiyle zabt olunmasını bi’l-vekâle da‘vâ ve şehr-i mezbûrun on üçüncü gününden i‘tibâr ile evvelâ bir sene müvekkilem zevcem mezbûre Emine Hatun ve sâniyen bir sene gāibe-i merkūme Âişe Hatun tasarruf etmek üzere kıbel-i şer‘den müvekkilem mezbûre yedine bir kıt‘a i‘lâm-ı şer‘î i‘tâ olundukdan sonra müvekkilem zevcem mezbûre beni dükkân-ı mezkûrda iskân murâd etmekle esnâf-ı merkūmûn bana destûr verip usta etmek üzere esnâf-ı merkūmûna tenbîh olunmak matlûbumdur [deyü] ba‘de’d-da‘vâ ve’l-istintâk esnâf-ı merkūmûn dahi cevâblarında işbu yedimizde olup bin yüz seksen dokuz senesi evâil-i şehr-i Rebî‘ülâhiri târihiyle müverrah bâlâsı tuğrâ-yı garrâ ile mu‘anven bir kıt‘a fermân-ı âlî-şân nâtık olduğu üzere biz hınta ve şa‘îr döğücü esnâfından olup dükkânlarımız mahâll-i ma‘lûmede ma‘dûd ve ustalarımız bir birimize kefîl ve cümlemize kethudâlarımız kefîl olmağla ibâdullâha evlâ ve enfa‘ olmak için beynlerimizde hâm-dest olup üstâda varıp hizmet edip kethudâlarımız ve ihtiyârlarımız ma‘rifeti olmadıkça kimesne başka dükkân ihdâs etmemek ve bu makūle usta dâmâdı ve sâir akrabâsından biri san‘at-ı mezkûrede mahâreti olmayıp hâm-dest olarak kendüye irs-i şer‘le intikāl eden dükkâna girmek murâd etdikde dört beş sene esnâfımızdan üstâda hizmet edip pîr perver usta olmadıkça dükkânına girmemek dahi şurût-ı nizâm-ı mer‘iyemizden olduğuna binâen müvekkile-i mezbûrenin zevci müdde‘î-i merkūm Mehmed Ağa’nın san‘at-ı mezkûrede mahâreti olmamağla dört beş sene esnâfımızdan üstâda hizmet edip destûr alıp ba‘dehû dükkânda sâkin olsun dediklerinde vekîl-i müdde‘î-i mezbûr Mehmed Ağa dahi mücâb ve mülzem olup lâkin müdde‘î-i merkūm Mehmed Ağa âhar san‘at ile melûf olmağla esnâf-ı merkūmûn rızâlarıyla müvekkile-i mezbûre Emine Hatun’a şerîk olmak üzere işbu hâzır bi’l-meclis Hüseyin Beşe b. Ali nâm kimesneyi dükkân-ı mezkûra idhâl etmek üzere râbıta ve tanzîm etdiklerinde onlar dahi ber-vech-i meşrûh şirket-i mezkûreyi kabûl edip bu vechile kat‘-ı münâza‘a eylediklerinden sonra esnâf-ı merkūmûn san‘at ve nizâm-ı mer‘iyelerini muhâfaza zımnında bundan böyle bu makūle âhar san‘at ile melûf ve hâm-dest kimesneler dört nihâyet beş sene hizmet etmedikçe destûr verin, usta çıkarın deyü rencîde ve nizâ‘ etmemeleri için yedlerinde olan emr-i âlî-şânın şurûtunu derc ile tecdîden bâlâsı tuğrâ-yı garrâ-yı cihân-dârî ile müveşşah bir kıt‘a fermân-ı âlî-şân sudûru niyâzında oldukları İstanbul Mahkemesi’nden huzûr-ı [âlîlerine i‘lâm olundu.] Fî selhi S sene 1223