İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 310 Hüküm no: 283 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Mehmed’in Seyyid Halil Ağa aleyhindeki davasının, anlaşmazlığa konu olan eşyayı gasb eden Fatma ve Ayşe’nin bulunduğu mahalde görülmesi Mahâllinde rü’yet için fermân istid‘âsı Ma‘rûz Sâhib-i arzuhâl Âsitâne-i aliyye’de müsâfireten sâkin Kayseriyeli el-Hâc es-Seyyid Mehmed Efendi b. es-Seyyid Ömer meclis-i şer‘de Silahşor-ı hazret-i şehriyârî es-Seyyid Halil Ağa b. Osman muvâcehesinde bundan akdem müteveffiye olan zevcesi Şerife Fatıma Hatun bt. el-Hâc Osman’ın usûbet-i nesebiyye cihetinden vârisi olduğumu bi’l-muvâcehe isbât edip müteveffât-ı mezbûrenin terekesine vâzı‘ü’l-yed olmağla hisse-i irsiyemi taleb ederim deyü ba‘de’d-da‘vâ ve’l-istintâk merkūm es-Seyyid Halil Ağa cevâbında eğerçi müteveffât-ı mezbûrenin tereke-i vâfiyesi olup târih-i i‘lâmdan on sene mukaddem ben Âsitâne-i aliyye cânibine râhî olacağım esnâda zevcem müteveffât-ı mezbûre cemm-i gafîr şühûd mahzarında medîne-i mezbûrede sâkin olduğum mülk menzilin orta kapısı dâhili harem tarafında olan bâ-müfredât-ı defter eşyâ ile menzil-i merkūmun ol mahâlli benim mülküm ve malım olduğunu ve bir aded sepet sandığı derûnunda bâ-müfredât-ı defter memlû eşyâ benim malım olduğunu hayatında ve kemâl-i akl ve sıhhatinde ikrâr ü i‘tirâf edip ve menzil-i merkūmun hâriciyesinde bulunan eşyâ ve sâir emvâli olmağla sülüs malını vücûh-ı birre sarfa beni vasîyy-i muhtâr nasb ü ta‘yîn edip musırran alâ-îsâihî fevt olduğu hînde zevi’l-erhâmdan bulunup şer‘an kendülere hisse-i irsiye isâbet eder akrabâsından olmayan Binbaşı Şebtan? Beştan? Ömer zevcesi Şerife Fatıma ile es-Seyyid Koca demekle ma‘rûf nâm kimesne zevcesi Âişe, zevcleri mütegallibeden sâbıkā Kayseriye Mütesellimi olan Dırazoğlu el-Hâc İsmail nâm maktûle istinâden merkūmetân müteveffât-ı mezbûrenin bâ-müfredât-ı defter ikrâr ve i‘tirâfıyla sâbit olan emvâl ve eşyâmı ve müteveffât-ı mezbûrenin mârrü’z-zikr terekesini cebren ve kahren yedimden ahz ancak yedimde yetmiş guruş mikdârı tereke kalmağla bu vechile bana gadr-ı küllî olduğuna hâzırûn bi’l-meclis sâbıkā Mekke-i Mükerreme kādısı Hatibzâde es-Seyyid Mehmed Emin Efendi dâ‘îleri ve Sakabaşı-yı evvel el-Hâc Osman Ağa b. el-Hâc Mustafa ve Süleyman Efendi b. el-Hâc İbrahim ve Bostânî el-Hâc Mehmed b. el-Hâc Ali ve sâir hüccâc-ı Müslimîn medîne-i mezbûreye mürûrlarında ve hâl minvâl-i meşrûh üzere olduğunu medîne-i mezbûre ahâlisinden Mustafa Ağa b. Ali ve Hüseyin Ağa b. Abdullah ve es-Seyyid Mehmed Efendi ve Abdullah Ağa ve Mustafa Çelebi ve sâir cemâ‘at-i kesîre mûmâ-ileyhin huzûrlarında ale’ş-şehâde haber vermeleriyle suâl olunsun dedikde li-ecli’l-istikşâf istifsâr olundukda vech-i meşrûh üzere şehâdetlerini ba‘de’l-ihbâr müdde‘î ve müdde‘â-aleyhin mütenâzi‘un-fîh olan tereke ve sâir emvâlin gāsıbeleri merkūmetân Şerife Fatıma ve Âişe medîne-i merkūme sâkinelerinden olmak hasebiyle kat‘-ı nizâ‘ mümkün olmayıp mahâllinde şer‘le rü’yet olunur mevâddan olduğunu kendülere tefhîm olunmağla bi’t-terâzî mahâllinde rü’yet ve ihkāk-ı hak buyurulmak bâbında emr-i âlîleri sudûrunu istirhâm eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 15 Ra sene 1223.