İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 316 Hüküm no: 289 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Arife ve damadı Halil Beşe’nin inşa edecekleri evin Aşçı Abdullah Beşe’nin evinine zararı dokunmaması Menzil keşfi, Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi Hâssa mi‘mârlarından es-Seyyid Mustafa ve Mehmed Halîfeler ile İstanbul’da Dülbendçi Hüsameddin mahallesinde vâki‘ nezâret-i dâ‘îlerinde âsûde evkāfdan zikr olunan Dülbendçi Hüsameddin câmi‘-i şerîfinde imâm ve müezzin olanlara galle ve tevliyeti meşrûta Kamer Hatun Vakfı’ndan bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde derûn-ı arzuhâlde mezkûrü’l-ism Aşçı Abdullah Beşe b. Hüseyin meclis-i ma‘kūd-ı mezkûrda sâhibetey-i arzuhâl zâtı mu‘arrefe Şerife Ârife bt. el-Hâc İbrahim asâleten ve dâmâdı Halil beşe b. Mustafa’nın zevcesi ve tarafından husûs-ı âtîde vekîl-i sâbitü’l-vekâlesi kezâlik zâtı mu‘arrefe Şerife Âdile bt. Süleyman nâm hatun vekâleten mahzarlarında mezbûrân bu esnâda menzilimin ittisâlinde vâki‘ tasarruflarında olan iki bâb menzile mahsûs olan tûlen dokuz buçuk zirâ‘ ve arzan bir zirâ‘ iki parmak tarîk-i hâssı menzillerine idhâl ve üzerine binâya şürû‘ edip lâkin tarîk-i mezkûr üzerine binâ olunduğu takdîrce benim menzilimin vüstâsında vâki‘ oda derûnunda bir aded pencere ve sofasında açıklık mahâllinin direk arası ve kenîfde mevcûd sagīr penceresi ve fevkānî kezâlik oda derûnunda bir pencere ve kezâlik sofasında açıklık mahâllinde direk arası sed olunacağı zâhir olmağla men‘ ü def‘ olunmak matlûbumdur deyü da‘vâya tasaddî etdikde mezbûrân Halil ve Şerife Ârife dahi arsa ve tarîk-i hâs üzerine ancak binâsının vasatına kadar binâ edip müdde‘î-i merkūmun menzili vasatında vâki‘ oda derûnunda bir aded penceresi ve açıklık mahâllinin direk arası sed ve kenîfde mevcûd sagīr pencere tabana muttasıl olarak kadden dört zirâ‘ tûlen ve arzan tesâvî ve fevkānî oda derûnunda mevcûde penceresi dahi sed ve açıklık mahâllinin direk arası ebnâ olunmak üzere binâya mezbûrân ta‘ahhüd eylediklerini mevlana-yı mezbûr mahâllinde ketb ü tahrîr ve ma‘an ümenâ-i şer‘le meclis-i şer‘a gelip alâ vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu.] Fî 19 Ra sene 1223.