İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 317 Hüküm no: 290 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’da Sandıkçılar başındaki Yeni Yağhane’de esnafça orta malı olarak bilinen Çifte Yağhane Gediği’nin Beykoz’a nakledilmesi Galata’da Yağhâne Ma‘rûz Âsitâne-i aliyye ve Bilâd-ı selâse tevâbi‘inde kâin bi’l-cümle şîrugan ve beziryağcı esnâfının kethudâsı es-Seyyid Ali Ağa ve esnâfından es-Seyyid İsmail ve Yusuf ve Mustafa ve Süleyman nâm kimesneler ile re‘âyâdan Lefter ve Nikola ve Kostandi ve diğer Kostandi ve Misayel ve Agoşti ve Praşkova ve Vasil ve sâirleri meclis-i şer‘-i münîrde her biri takrîr-i kelâm edip mahrûse-i Galata’da Sandıkçılarbaşı nâm mahâlde kâin Yeni Yağhâne demekle arîf bir bâb Yağhâne derûnunda mevcûde orta malı olarak beyne’l-hıref Çifte Yağhâne Gediği ta‘bîr olunur Başmuhâsebe’de mukayyed şurût-ı nizâmımızda dâhil âlât-ı lâzıme-i ma‘lûme yedimizde iken yağhâne-i mezkûre bundan bi-kazâillâhi te‘âlâ vukū‘ bulan harîkde muhterik [39b] ve gedik-i mezkûrun mahâll-i âhara nakl olunması şurût-ı nizâm-ı mer‘iyemizden olup ve medîne-i Üsküdar’a muzâfe Yoros nâhiyesine tâbi‘ Beykoz karyesine yağhânenin lüzûmu olduğunu ahâli-i karyenin inhâ ve ihbârlarına mebnî mârrü’z-zikr sandıkçılarbaşı nâm mahâlde olan muhterik yağhâne ba‘de’l-yevm yağhâne olmayıp âhar akāra tebdîl şartıyla gediği karye-i mezbûrede bir münâsib mahalle vaz‘ olunmak üzere yağhâne-i evvelin gedik kaydı mahâllinden ref‘ ve terkīn ve karye-i mezbûreye nakl olunmak için sûret i‘tâ olunmasını istid‘â ve istirhâm eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 21 Ra sene 1223.