İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 317 Hüküm no: 291 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikoli ve Yorgi’nin Dimitri v. Tohari aleyhindeki baratacı dükkânı gediği satışı davasının neticelendirilmediği Beratacı gediği mazbatadan ihrâç Ma‘rûz Arzuhâl eden Nikoli v. Yorgi zimmî meclis-i şer‘-i münîrde derûn-ı arzuhâlde mersûmü’l-ism Dimitri v. Tohari nâm zimmî muvâcehesinde İstanbul’da Kalpakçılar sûkunda vâki‘ bir bâb baratacı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme gāib ani’l-meclis Foti nâm zimmînin yedinde müstakıllen mülkü iken mersûm Dimitri zimmî gedik âlât-ı lâzıme-i mezkûreyi gāib-i mesfûr Foti zimmîden bundan akdemce iki bin üç yüz elli guruş semen-i medfû‘ ve makbûza iştirâ ve kabz etdikden sonra ben gedik-i mezkûru mersûm Dimitri zimmîden şirâya tâlib olduğumda zimmî-yi mersûm dahi semen olmak üzere medfû‘um olan meblağ-ı merkūm iki bin üç yüz elli guruşu getir bana ver, ben dahi gedik-i mezkûru sana bey‘ ve teslîm edeyim deyüp ba‘dehû ben mâlımdan iki bin üç yüz elli guruş mersûm Dimitri zimmîye bundan akdem def‘ ü teslîm, ol dahi ahz ü kabz edip lâkin gedik-i mezkûru bey‘den ibâ vü imtinâ‘ etmekle medfû‘um olan meblağ-ı merkūm iki bin üç yüz elli guruşunu bana redd ü teslîme mersûm Dimitri zimmîye tenbîh olunmak matlûbumdur deyü ba‘de’d-da‘vâ ve’l-inkâr müdde‘î-i mersûm Nikoli zimmî ber-vech-i muharrer müdde‘âsını isbât için şâhide havâle olunup tarafeyn bir dahi meclis-i şer‘a gelmemeleriyle henüz da‘vâlarına faysal verilmediği vekāyi‘ kâtibimiz cerîdesinde mazbût olmağın imtisâlen li’l-emri’l-âlî sûret-i zabtı İstanbul Mahkemesi’nden huzûr-ı [âlîlerine i‘lâm olundu.] Fî 25 Ra sene 1223.