İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 319 Hüküm no: 293 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Zeliha’nın kendisi gibi ihtida eden ilk eşiyle evli olduklarının tesbiti Hatun nefsini zevc-i evvele teslîmi Ma‘rûz Sâhib-i arzuhâl mühtedî Osman b. Abdullah meclis-i şer‘-i münîrde zevcesi olup derûn-ı arzuhâlde mezkûretü’l-ism mu‘arrefetü’z-zât mühtediye Zeliha bt. Abdullah nâm hatun muvâcehesinde mühtedî Mehmed Ali Beşe b. Abdullah hâzır olduğu hâlde ben ve mezbûre Zeliha hatun şeref-i İslâmla müşerref olmazdan mukaddem sene-i sâbıkā Ramazani’l-mübârekinin on beşinci günü mezbûre Zeliha Hatun kasaba-i Kasımpaşa Mahkemesi’nde huzûr-ı hâkimü’ş-şer‘de yüz yirmi guruş mehr-i müeccel tesmiyesiyle nefsini bana tezvîc ve tenkîh, ben dahi tezevvüc ve duhûl edip ol-vechile mezbûre Zeliha Hatun benim zevce-i medhûlün-bihâm iken mezbûre Zeliha Hatun bu esnâda şeref-i İslâm ile müşerrefe ve ba‘dehû beynimiz tefrîk olunmaksızın ben dahi şeref-i İslâm ile müşerref olup ben tecdîd-i nikâh etmedin mezbûre Zeliha Hatun ile ezvâc mu‘âmelesinde şer‘an kādir olup lâkin mezbûre Zeliha Hatun nefsini çend rûz mukaddem hâzır-ı merkūm Mehmed Ali Beşe’ye tezvîc edip hâzır-ı merkūm dahi mezbûreye zevciyet mu‘âmelesi murâd etmekle men‘ olunmak matlûbumdur deyü da‘vâ ve merkūme Zeliha Hatun husûs-ı mezkûru ber-vech-i muharrer ikrâr ü i‘tirâf ve hâzır-ı merkūm Mehmed Ali Beşe dahi bi-tamamihi tasdîk etmeğin mûcebince hâzır-ı merkūm mezbûre Zeliha Hatun’a zevciyet mu‘âmelesinden ba‘de’l-men‘ nefsini zevc-i evvel müdde‘î-i merkūm Osman’a teslîme tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 23 Ra sene 1223.