İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 320 Hüküm no: 294 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Aci Nikola’nın vârisleri Yanaki ve kardeşleri Agoriçe, Katerina, Kostantine ile diğer kardeşleri Kostandi, Yorgi, Tanaş, Astori ve Saltana’nın Hünkâr ve Mütevelli dükkânlarını nöbetleşe kullanmaları Langa’da bakkāl gediği Ma‘rûz Bakkāl tâifesinden olup işbu târihden on sene mukaddem hâlik olan Aci Nikola zimmînin evlâd-ı kibârı derûn-ı arzuhâlde mersûmü’l-ism Yanaki zimmî asâleten ve kız karındaşı Agoriçe Nasrâniyenin zevci ve tarafından husûs-ı âti’l-beyânda vekîl olduğu şahsını ârifân Ligori v. Yorgi ve Yani v. Kostantin nâm zimmîler şehâdetleriyle sâbit olan sâhib-i arzuhâl Nikola v. Yorgi ve diğer karındaşları Katerina ve Kostantine Nasrâniyeler taraflarından kezâlik husûs-ı âtîde vekîl olduğu şahıslarını ârifân şâhidân-ı mersûmân şehâdetleriyle sâbit olan mersûme Katerina Nasrâniyenin zevci Anton v. Polimi zimmîler vekâleten her biri meclis-i şer‘-i hatîrde mersûmûnun âhar karındaşları Kostandi ve Yorgi zimmîler asâleten ve kezâlik derûn-ı arzuhâlde mersûmü’l-ism Tanaş zimmî kendi nefsinden asâleten ve karındaşları Astori zimmî ve Saltana Nasrâniye taraflarından husûs-ı âtîde vekîl olduğu mersûmenin şahsını ârifân Kostanti ve Yorgi zimmîler şehâdetleriyle sâbit olmağla vekâleten muvâcehelerinde Hudâvendigâr-ı esbak cennet-mekân firdevs-âşiyân merhûm Sultan Mustafa Han -tâbe serâhû- Hazretleri Evkāf-ı şerîfelerinden olup İstanbul hısnı ebvâbından [40a] Langa Yenikapısı hâricinde Yeni mahallede kāni‘ Hünkâr Dükkânı demekle ma‘rûf bir bâb ve yine hısn-ı merkūm hâricinde İskelebaşı nâm mahâlde vâki‘ Mütevellî Dükkânı demekle arîf bir bâb ki cem‘an iki bâb bakkāl dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerin her biri yüz yirmişer sehmden iki yüz kırk sehm i‘tibârıyla yirmi dörder sehmden kırk sekiz sehmi benim ve on ikişer sehmden yirmi dörder sehmi karındaşlarım mersûmûn Kostandi ve Yorgi ve Tanaş ve Astori zimmîler ile Agoriçe ve Katerina ve Kostantine ve Saltana Nasrâniyelerin bâ-temessük-i mütevellî taht-ı tasarrufumuzda olup lâkin işbu târihe gelince on seneden beri mersûmûn Kostandi ve Yorgi ve Tanaş ve Astori zimmîler ile Saltana Nasrâniye mârrü’z-zikr Hünkâr Dükkânı’nı zabt ve âlât-ı lâzıme-i merkūmeyi her biri müstakıllen tasarruf etmeleriyle zikr olunan iki bâb dükkân derûnlarında mevcûde gedik âlât-ı lâzımeleri beynimizde muhâyât tarîkiyle evvelen mârrü’l-beyân Hünkâr Dükkânı’nda olan âlât-ı lâzımeyi ben ve kız karındaşlarım müvekkilât-ı mersûmât Agoriçe ve Katerina ve Kostantine Nasrâniyeler ve zikr olunan Mütevellî dükkânında olan âlât-ı lâzımeyi mesfûrûn Kostandi ve Yorgi ve Tanaş ve Astori zimmîler ile Saltana Nasrâniye ve sâniyen biz zikri mürûr eden Mütevellî Dükkânı’nda mesfûrûn Hünkâr Dükkânı’nda tasarruf etmek üzere tenbîh olunmak matlûbumuzdur deyü Pazarbaşı Süleyman Ağa ve Bölükbaşı es-Seyyid Ahmed ile bi’l-cümle nizâm ustaları hâzır oldukları hâlde bi’l-asâle ve bi’l-vekâle da‘vâ etdiklerinde onlar dahi cevâblarında husûs-ı mezkûru asâleten ve vekâleten her biri bi-tamamihi ikrâr ü i‘tirâf ve şehr-i âtî Rebî‘ülâhir gurresinden i‘tibâr ile sâlifü’z-zikr Hünkâr dükkânında olan âlât-ı lâzımeyi müdde‘ûn-ı mersûmûn ve zikr olunan mütevellî dükkânında olan âlât-ı lâzımeyi müdde‘â-aleyh-i mersûmûn evvelen birer sene ve sâniyen tarafeyn âharın dükkânına girip tasarruf edip ahadühümâ âharın zamanına ta‘arruz etmemek üzere müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 25 Ra sene 1223.