İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 326 Hüküm no: 303 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin izinsiz açtığı Sinanpaşa mahallesindeki Balmumcu dükkânının kapatılması Balmumcu kârhânesi güşâdına dâir Ma‘rûz Ashâb-ı arzuhâl Âsitâne-i aliyye ve Bilâd-ı selâse’de vâki‘ Balmumcu esnâfının kethudâsı es-Seyyid Mahmud Ağa ve yiğitbaşısı es-Seyyid Mehmed Emin ve müsinn ü ihtiyârlarından es-Seyyid Hüseyin ve Nâibzâde Mehmed Emin ve Ahmed ve Mustafa ve diğer Mustafa ve Ali ve diğer Mehmed Emin ve Ahmed ve Mehmed ve es-Seyyid Mehmed ve sâir bi’l-cümle Balmumcu esnâfı meclis-i şer‘-i münîrde derûn-ı arzuhâlde mezkûrü’l-ism Hasan Beşe b. Ali nâm kimesne muvâcehesinde mezbûr Hasan Beşe esnâfımız kalfalarından olup lâkin bu esnâda mahrûse-i Galata’ya muzâfe kasaba-i Kasımpaşa’da Sinanpaşa mahallesinde Âişe Hatun’un menzili derûnunda müceddeden bir aded Balmumcu kârhânesi binâ ve ihdâs ve küşâd edip lâkin Âsitâne-i aliyye ve Bilâd-ı selâse’de vâki‘ mahâll-i ma‘lûmede müte‘addid balmumcu dükkânları ve kârhâneleri mukayyed ve mu‘teber gediklerden olup ziyâde olmaması meşrût iken bundan mukaddem kârhâne zammı iktizâ eylediğinde bir iki aded kârhâne şurût-ı nizâmımıza tatbîkan ashâbının i‘mâl eyledikleri mumlara kalb ve redî olmaması için darb olunacak mühürleri es‘âr sicilline ba‘de’l-kayd bâ-i‘lâm ve bâ-fermân-ı âlî küşâd olunmuş olup lâkin bilâ-i‘lâm ve bilâ-fermân kârhâne ihdâs ve küşâdı mesbûk olmadığından mâ‘adâ medîne- Üsküdar’da iki aded kârhâne el-yevm mesdûd olmağla mezbûr Hasan Beşe bu def‘a ihdâs ve küşâd eylediği kârhâneyi sedd ü bend edip medîne-i mezbûrede mesdûd olan iki aded kârhânenin dilerse birisini ve dilerse ikisini küşâd eylemek üzere mezbûr Hasan Beşe’ye tenbîh olunmak matlûbumuzdur dediklerinde ol dahi cevâbında esnâf-ı müdde‘ûn-ı mezbûrûnu bi-tamamihi tasdîk etmeğin ber-mûceb-i şurût-ı nizâm ihdâs ve küşâd eylediği mârrü’z-zikr Sinanpaşa mahallesinde kâin bir aded kârhânenin sedd ü bend olunması iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 25 Ra sene 1223.