İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 326 Hüküm no: 304 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolapçı esnafı olarak bilinen ipek bükücü esnaflığından çıkarılan eski Kethuda Mehmed Said ve Yiğitbaşı Ahmed’in esnafdaki görevlerine dönmeleri Harîr bükücü esnâfına kethudâ ve yiğitbaşı ibkāsı Ma‘rûz Âsitâne-i aliyye’de vâki‘ Dolabçı ta‘bîr olunur harîr bükücü esnâfının kethudâsı Mustafa Ağa ve yiğitbaşısı Hüseyin Usta ve müsinn ü ihtiyârlarından es-Seyyid Ahmed ve Mehmed Emin ve diğer es-Seyyid Ahmed ve Hüseyin ve el-Hâc Mustafa ve Mahmud ve es-Seyyid Numan ve el-Hâc İsmail ve Süleyman ve es-Seyyid Cafer ve es-Seyyid Mehmed Ârif ve diğer Hüseyin ve Ali ve Ahmed Nuri ve diğer Mehmed ve Ahmed ve es-Seyyid İbrahim ve es-Seyyid Mehmed ve İbraim ve Halil ve Yusuf ve Hafız Süleyman ve es-Seyyid Osman ve âhar Hüseyn ve diğer Süleyman ve Mustafa ve sâir bi’l-cümle dolapçı esnâfı meclis-i şer‘-i münîrde esnâf-ı mezbûrenin sâbıkā kethudâsı Mehmed Said ve yiğitbaşısı Ahmed nâm kimesneler muvâcehelerinde merkūmân mukaddemâ esnâfımızın kethudâ ve yiğitbaşısı olup bundan akdem ba‘zılarımızın nefsâniyetlerine binâen ba‘zı cünha isnâdıyla san‘atımızdan bâ-i‘lâm tard ve ihrâc etdirmiş idik. El-hâletü hâzihî biz da‘vâ-yı mezkûrelerimizden nükûl ve yedimizde olan i‘lâm-ı mezkûru rızâmızla merkūmâna teslîm ve yine içimize idhâl ve ke’l-evvel başımız ile beraber ustamız olup san‘at-ı mezkûrede ilâ-mâşâallâhu te‘âlâ ta‘ayyüş edip bizler umûr ve husûslarına kat‘a müdâhale ve ta‘arruz etmeyiz deyüp bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 21 Ra sene 1223.