İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 327 Hüküm no: 305 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. At arabacıları esnafının, bazı kimselerin Kağıthane ve Alibeyköy civarından öküz arabaları ve parmaklıklı köy arabalarıyla Eyüb’e gelerek müşterilerini kaptıklarından yasaklanmalarını istemeleri Öküz arabaları ve tâlîkaları men‘ için fermân istid‘âsı Ma‘rûz Sâdır olan fermân-ı âlîlerine imtisâlen ashâb-ı arzuhâl Âsitâne-i aliyye’de vâki‘ arabacıyân-ı esb ve mülhak tâlîkacılar esnâfının kethudâsı ve müsinn ü ihtiyârlarından mazbûtü’l-esâmî kimesneler meclis-i şer‘-i münîrde her biri takrîr-i kelâm edip biz Âsitâne-i aliyye’de vâki‘ arabacıyân-ı esb ve mülhak olan tâlîkacılar esnâfı olup yedimizde olan fermân-ı âlî-şân mûcebince kadîmü’l-eyyâmdan beri fıçı ve tâlîkacı ta‘bîr olunur arabacılık bizlere mahsûs olup sefer ve hazarda cânib-i mîrîden üzerimize vârid olan tekâlif ve hidemât-ı lâzımemizi bî-kusûr medyûnen edâ ve idâre edegeldiğimiz ecilden bizlerden mâ‘adâ kimesneler pûşîdeli arabalar ile arabacılık etmek memnû‘âtdan olup ez-kadîm Kâğıdhâne ve Alibey karyelerinden ba‘zı mesâlihlerini rü’yet için iktizâ edenler parmaklıklı köy arabalarıyla Eyüb ve Âsitâne-i aliyye’ye mürûr ve ubûr edip tehî bir mahâlde müşteri celbi için min-ba‘d ittifâk etmemek kā‘ide-i mer‘iye-i kadîmeden iken bundan akdem kat‘a san‘at-ı mezkûrede alâkası olmayan Hüseyin ve Abdullah ve İsmail ve sâir mechûlü’l-ahvâl kimesneler karyeteyn-i mezbûreteynde hadden ziyâde mu‘anven? [ve] pûşîdeli öküz arabaları ihdâs edip Cuma ve eyyâm-ı sâirede müşteri celbi için Eyüb ve Âsitâne-i aliyye’ye tehî olarak irsâl ve ittifâk edip ol-vechile ihtilâl-i nizâm-ı kadîmimize bâ‘is ü bâdî olmalarıyla bin iki yüz on beş senesi şehr-i Rebî‘ülâhirinin on altıncı günü Hâslar kādısı merhûm Mehmed Şemseddin Efendi huzûrunda mezbûrûn ile mürâfa‘a ve muvâcehelerinde teşekkî eylediğimizde onlar dahi esnâfımıza ol-vechile ızrârlarında ısrâr ve adem-i itâ‘at eylediklerine binâen fîmâ-ba‘d kadîmî misillü parmaklıklı arabalarından mâ‘adâ ol-vechile bizlere mahsûs mu‘anven [ve] pûşîdeli arabalar ile medîne-i mezbûrede ve havâlîsinden müşteri celbi için ittifâk etmemek üzere yedlerimize bir kıt‘a tuğrâlı emr-i âlî-şân i‘tâsı bâbında kādı-yı mûmâ-ileyh i‘lâm etmekle i‘lâmı mûcebince Hâslar kādısına hitâben sene-i mezbûre Cumâdelâhiresinin on yedinci günü târihiyle müverrah bâlâsı tuğrâ-yı garrâ ile müveşşah bir kıt‘a fermân-ı âlî-şân yedimize i‘tâ olunmuş iken mezbûrûn bostaniyân zümresinden olup ve emr-i âlî-şân-ı mezkûr Bostancıbaşı ağaya hitâben olmadığından tenfîz-i icrâ-yı emr-i âlî olamayıp ol-vechile yedimizde olan emr-i âlînin şurûtu derc olunarak tecdîd ve istihkâmı hâvî ve bu makūle ihdâs eyledikleri mu‘anven ve pûşîdeli öküz arabaları ve tâlîkaları bulunduğu mahâlden men‘ ve itâ‘at-ı emr-i âlî etmeyenleri zâbiti ma‘rifetiyle tedîb olunmak üzere hükkâm-ı kirâm ve izzetlü Sekbânbaşı ve Bostancıbaşı ağa kullarına hitâben bâlâsı tuğrâ-yı garrâ-yı cihân-dârî ile müveşşah bir kıt‘a fermân-ı âlî-şân istid‘â ve istirhâm eyledikleri İstanbul Mahkemesi’nden huzûr-ı [âlîlerine i‘lâm olundu.] Fî-gurreti Rebî‘ülâhir sene 1223.