İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 330 Hüküm no: 307 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman’ın vefat eden oğlu Ahmed’in vârisleri Hadice ile Osman ve Ömer aleyhindeki yağcı mahzeni gediği davasının reddedilmesi Galata’da yağcı mahzeni gediği, Ma‘rûz Mahrûse-i Galata sâkinlerinden olup bundan akdem diyâr-ı âhara firâr ve gaybet-i munkatı‘a ile gāib ve mefkūd olan Ali b. el-Hâc Osman’ın vâlidesi olup malını zabt ve hıfza kıbel-i şer‘den vasî ve kayyım nasb olunan sâhibe-i arzuhâl zâtı mu‘arrefe Âişe bt. Osman nâm hatun meclis-i şer‘-i münîrde diğer sadrî oğlu olup bundan akdem vefât eden derûn-ı arzuhâlde mezkûrü’l-ism Ahmed Ağa b. el-Hâc Osman nâm kimesnenin verâseti zevce-i menkûha-i metrûkesi Hadice bt. Mehmed nâm hatun ile vâlidesi mezbûre Âişe Hatun’a ve sulbî sagīr oğulları Osman ve Ömer’e ba‘de’l-inhisâr zâtı mu‘arrefe zevce-i mezbûre Hadice Hatun asâleten ve sagīr-i mezbûrânın min-kıbeli’l-üm ceddeleri ve tesviye-i emirlerine vasîyy-i mansûbeleri kezâlik zâtı mu‘arrefe Âkıle bt. Hüseyin nâm hatun vesâyeten muvâcehelerinde mahrûse-i Galata Yağkapanı’nda vâki‘ ma‘lûmü’l-hudûd bir bâb yağcı mahzeni derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf-ı şâyi‘i oğlum firârî-i mezbûr Ali’nin ve nısf-ı şâyi‘-i âharı diğer oğlum müteveffâ-yı merkūm Ahmed Ağa’nın bâ-sûret-i hümâyûn yedlerinde iştirâken ve şâyi‘an mülk ve hakları iken diğer oğlum mezbûr Ahmed Ağa fevt olup gedik-i mezkûrun mecmû‘u müteveffâ-yı mezbûrun mülküdür deyü mezbûretân Hadice ve Âkıle hatunlar bi’l-asâle ve bi’l-vesâye zabt ve vaz‘-ı yed etmeleriyle nısf gedik-i mezkûrdan keff-i yed birle oğlum firârî-yi mezbûr için bana teslîme mezbûretâna tenbîh olunmak bi’l-vesâye matlûbumdur deyü da‘vâ etdikde onlar dahi cevâblarında gedik-i mezkûrun mecmû‘u mûrisimiz müteveffâ-yı mezbûr Ahmed Ağa hayatında müstakıllen semen-i ma‘lûme âhardan iştirâ edip ba‘dehû mezbûr Ahmed Ağa karındaşı merkūm Ali diyâr-ı âharda iken yağcı mahzeni gedikleri bâ-emr-i âlî Başmuhâsebe’ye kayd olundukda mezbûrânın ammizâdeleri el-Hâc Mustafa Ağa gedik-i mezkûru sehven mezbûrân Ahmed Ağa ve Ali üzerlerine kayd etdirmiş idi deyüp ve husûs-ı mezkûr merkūm el-Hâc Mustafa Ağa ve kapan-ı mezbûr nâzırı es-Seyyid el-Hâc Ali Ağa ve tüccârından Hafız es-Seyyid Ahmed Efendi ve Abdurrahman Ağa ve Ketânî Hasan Ağa ve sâir bi’l-cümle kapan tüccârından istintâk olundukda onlar dahi kaziyye minvâl-i meşrûh üzere olduğunu her biri bi’l-muvâcehe alâ-tarîki’ş-şehâde haber vermeleriyle ol-vechile müdde‘iye-i vasîyy-i mezbûre Âişe Hatun da‘vâ-yı mezkûresiyle verese-i mezbûrûna bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 21 Ra sene 1223.