İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 336 Hüküm no: 315 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kosta’ya olan borcunu ödemesi hususunda Çörekçi esnafından Ebubekir Beşe’nin mecbur bırakılması Elli guruş hüküm Ma‘rûz Arzuhâl eden Yani v. Kosta nâm zimmî meclis-i şer‘-i münîrde derûn-ı arzuhâlde mezkûrü’l-ism Çörekçi esnâfından Ebûbekir Beşe b. Mustafa muvâcehesinde mezbûr Ebûbekir Beşe zimmetinde cihet-i karzdan elli guruş alacak hakkım olmağla hâlâ taleb ederim deyü da‘vâ etdikde ol dahi cevâbında ber-vech-i muharrer ikrâr, lâkin İstanbul’da Çakmakçılar sûkunda Küçük Yeni Han tahtında kâin bir bâb Çörekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘i benim yedimde mülküm iken ben gedik-i mezkûr icâresinden altı sene müddetde kat‘a nesne almayıp ancak bir sene müdde‘î-i mersûm Yani zimmî dükkân-ı mezkûrda mütemekkin ve bir senelik nısf gedik icâresi olmak üzere bana yüz yirmi guruş vermekle mâ‘adâ beş senelik altı yüz guruş nısf gedik icâresi vermek üzere mersûma tenbîh olunmak matlûbumdur deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle müdde‘î-i mesfûre bî-vech-i şerî‘î mu‘ârazadan ba‘de’l-men‘ sâlifü’l-beyân ikrâr u i‘tirâfıyla lâzım gelen meblağ-ı merkūm elli guruşun müdde‘î-i mersûm Yani zimmîye edâsıyla mezbûr Ebûbekir Beşe ilzâm olunduğu İstanbul Mahkemesi’nden huzûr-ı [âlîlerine i‘lâm olundu]. Fî 5 Rebî‘ülâhir sene 1223.