İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 344 Hüküm no: 324 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmudpaşa Mahkemesi’nin bulunduğu hanın üzerine Hafize Hatun tarafından inşa edilen odanın yıkılması ve damlalığın açılması Mahmudpaşa Mahkemesi Üzerine Sakf nizâ‘ı keşfi Ma‘ruz, Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi hâssa mi‘mârı hulefâsından Halil ve es-Seyyid İbrahim Edhem Halîfeler ile nezâret-i dâ‘îlerinde âsûde evkāfdan Hoca Dursun Vakfı’ndan İstanbul’da Mahmudpaşa-yı Velî civârında vâki‘ münâza‘un-fih olan Armutçu Hanı demekle ma‘rûf hana varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde Mahmud Paşa-yı Velî Mahkemesi mutasarrıfları olup kendi nefsinden asıl ve hemşîresi Esma Hanım tarafından vekîl-i sâbitü’l-vekâlesi müderrisîn-i kirâmdan Mehmed Sun‘ullah Efendi b. el-müvellâ el-merhûm Hamîdî el-Hâc Mustafa Efendi meclis-i ma‘kūd-ı mezkûrda hân-ı mezbûre mutasarrıfesi sâhibe-i arzuhâl mu‘arrefetü’z-zât Hafize bt. Abdullah mahzarında vakf-ı mezbûr mütevelliyesi Züleyha bt. Mehmed Emin nâm hatun tarafından mürsel vekîli Süleyman Çelebi b. Ömer hâzır olduğu hâlde işbu sed duvar üzerine mukaddemâ mebnâ olan fevkānî ve tahtânî iki odanın yağmur suyu cereyân edip damlalığı olmağla zikr olunan oda hedm ve mahkeme-i mezbûr geri binâ olunduğuna binâen mezbûre Hafize Hatun bundan akdem el-yevm mevcûd olan hanların esenyât-ı? asliyelerinden fazla içlerinde oda zamîme ve hâricden arsa ilhâk ve sâir vechile tevsî‘ olunmalarına zinhâr ve zinhâr mesâğ gösterilmeye deyü bin iki yüz yirmi bir senesi Muharremi’l-harâmı evâhirinde bâ-hatt-ı hümâyûn sâdır olan emr-i âlî-şânın hilâfına hân-ı mezkûrun heyet-i asliyesinden hâric derûnunda verâsı tarafında bir bâb odanın sakfını ref‘ ve üzerine müceddeden bir bâb oda ihdâsına şürû‘ ve arzan bir zirâ‘ ve tûlen dört zirâ‘ altı parmak mahkeme-i mezbûrenin damlalık mahâllini gasb etmekle sâlifü’z-zikr ihdâs eylediği fevkānî odayı ref‘ ve gasb eylediği damlalık mahâllinden keff-i yedine tenbîh olunmak bi’l-asâle ve bi’l-vekâle matlûbumdur deyü da‘vâ etdikde evvelâ husûs-ı mezkûra vukūf-ı tammı olan es-Seyyid Mehmed Haşim Efendi b. Mehmed Said ve Lütfullah Efendi b. Süleyman ve Süleyman Efendi b. İsmail ve Ömer Vahid Efendi b. Abdullah ve Yusuf Efendi b. Osman ve Mehmed Ârif Efendi b. Ömer ve Numan Efendi b. Ahmed ve es-Seyyid Mehmed Said Efendi b. Ahmed ve sâir mazbûtü’l-esâmî kimesnelerden istintâk olundukda onlar dahi cevâblarında mezbûre Hafize Hatun hân-ı mezkûrun tahtânî odasının sakfını ref‘ ve üzerine müceddeden ihdâsına şürû‘ eylediği oda mahâlli mahkeme-i mezbûrenin yağmur suyu cereyânı edip ol-vechile damlalık mahâlli olduğunu her biri bi’l-muvâcehe alâ tarîki’ş-şehâde ihbâr eylediklerinde mezbûre Hafize Hatun dahi tasdîk etmeğin mûcebince bâ-hatt-ı hümâyûn memnû‘âtdan olduğu bâlâda tafsîl olunduğu üzere ihdâs eylediği fevkānî odanın ref‘i iktizâ eylediğini mi‘mârân-ı mezbûrân haber vermeleriyle mûcebince muhdes olan oda-i mezkûreyi ref‘ birle mahkeme-i mezbûrenin damlalık mahâllinden keff-i yedine mezbûre Hafize Hatun’a tenbîh edildiğini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu]. Fî 10 Rebî‘ülâhir sene 1223.