İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 346 Hüküm no: 325 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırmızı Terlikçi esnafının kethudası Hacı Ömer ve sair esnafın, Dikici esnafından küreğe konulan Artin, Mardıros ve Galatalı Kostantin’in affedilmesi talepleri Kürekden ıtlâkını iltimâs Ma‘rûz Âsitâne-i aliyye’de Mercan Çarşısı’nda vâki‘ Kırmızı derlikçi esnâfının kethudâsı el-Hâc Ömer ve yiğitbaşısı Ahmed ve ustalarından Ahmed ve İsmail ve sâirleri ile Dârü’s-sa‘âdeti’ş-şerîfe Ağası nezâretlerinde âsûde evkāfdan Hudâvendigâr-ı sâbık vâlidesi merhûme Mihrişah Sultan -tâbe serâhâ- evkāfından İstanbul’da Vefa Hanı’nda müstecir olup re‘âyânın giydikleri siyâh ve kırmızı ve lök sahtiyândan pabûş i‘mâli kendülere mahsûs olan altmış nefer mazbûtü’l-esâmî ustalar ve yine vakf-ı müşârün-ileyhâ musakkafâtından İstanbul’da Dülbençi mahallesinde bir bâb handa müstecir olup kezâlik re‘âyânın giydikleri kırmızı mest ve çedik ve terlik i‘mâli kendülere münhasır olan yirmi nefer ustalar meclis-i şer‘-i münîrde Dikicibaşı İbrahim Ağa ve Başyiğitbaşısı İbiş Ağa ve Galata Dikicibaşısı İsmail Ağa ve Yiğitbaşısı Mehmed Usta hâzır oldukları hâlde her biri takrîr-i kelâm edip işbu yedimizde olup bâlâları mübârek hatt-ı hümâyûn-ı şevket-makrûn ile müzeyyen evâmir-i aliyye-i müte‘addide mantûklarınca siyâh ve kırmızı ve lök ve bakkām sahtiyândan pabûş ve mest ve çedik ve terlik i‘mâli bizlere mahsûs olup bizlerden mâ‘adâ kimesne bizim metâ‘-ı mahsûsamızı işlemeyip şurût-ı mezkûremize ri‘âyet üzre iken sarı pabûş i‘mâl eden dikici esnâfından Artin v. Salamon ve Mardıros v. Karabet ve Galatalı Kostantin v. Panayot nâm üç nefer zimmîler kendi emti‘alarına kanâ‘at etmeyip hilâf-ı hatt-ı hümâyûn bizim i‘mâl eylediğimiz emti‘amızı i‘mâl ile şurût-ı nizâmımızı muhtel ve müşevveş olmasına bâ‘is ü bâdî olduklarına binâen bundan akdem bâ-i‘lâm li-ecli’t-tedîb vaz‘-ı kürek olunmuş idi. El-hâletü hâzihî zimmîyyûn-ı mersûmûn ıslâh-ı nefs olunup ba‘de’l-yevm herbiri destgâhı başına oturup kâr ü kisbiyle meşgūl olup bizim metâ‘-ı mahsûsamızı i‘mâl etmemek üzere hâzırûn-ı mezbûrûn ve bi’l-cümle esnâfı kefîl olmalarıyla biz dahi vech-i meşrûh üzere râzı olduk dediklerinde zimmîyyûn-ı mersûmûnun kürekden afv ve ıtlâk ve sebîlleri tahliye olunmak bâbında istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu.] 21 Rebî‘ülâhir sene 1223.