İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 346 Hüküm no: 326 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapan tüccarından Ahmed Ağa’ya olan borcunu ödemesi hususunda Tüccar Abdullah Ağa’ya tenbihte bulunulması 400 guruş hüküm Ma‘rûz Âsitâne-i aliyye’de sâkine Kapan tüccârından Ahmed Ağa b. Mehmed nâm kimesne meclis-i şer‘-i münîrde tüccârdan Abdullah Ağa b. Mehmed Emin muvâcehesinde vilâyet-i Anadolu’da Trabzon iskelesinde sefîne reislerinden Kādıoğlu Memiş Alemdar hâzır olduğu hâlde yine sefîne reislerinden işbu Ahmed Reis ve Veliyüddin b. Ahmed Ağa ve gāib ani’l-meclis Molla Süleyman nâm kimesneler hâzır bi’l-meclis merkūm Kādıoğlu Memiş Alemdar benim sefînemde reisim olup yedinde olan malımdan iskele-i mezbûrede iki bin dört yüz guruş istikrâz ve ahz u kabz ve ol dahi poliçe tarîkiyle yedlerine def‘ u teslîm mezbûrûn Ahmed Reis ve Veliyüddin Ağa ve gāib ani’l-meclis Molla Süleyman işbu Abdullah Ağa her birilerinin mührüyle temhîr eyledikleri temessükü hâzır-ı merkūm Memiş Alemdar ile irsâl ve merkūm Abdullah Ağa havâleten kabûl ve mârrü’z-zikr temessükün zahrına işbu bin ikiyüz yirmi üç senesi Saferi’l-hayrı gurresinde edâ ederim deyü tahrîr ve temhîr etmekle hâlâ taleb ederim deyü ba‘de’d-da‘vâ ve’l-istintâk merkūm Abdullah Ağa cevâbında minvâl-i muharrer üzere iskele-i merkūmede merkūmûn Ahmed Reis’in ve Veliyüddin Ağa b. Ahmed nâm kimesneler ile gāib ani’l-meclis Molla Süleyman’ın merkūm Memiş Alemdar’dan istikrâz ve kabz ve temessükü kendüye irsâl ve havâleten kabûl ve kabûlünü müş‘ir temessük-i mezkûr zahrına ikrârını muhtevî tahrîr ve temhîrini ikrâr ü i‘tirâf etdikde lâkin meblağ-ı merkūm iki bin dört yüz guruşu merkūm Memiş Alemdar’dan mezbûr Ahmed Ağa’nın malından olmak üzere istikrâz ve ahz ü kabz etdiklerinden sonra ehl-i örf tâifeleri cerâyim olarak kendülerden bi-gayrı hakkın ahz eyledi deyü tasaddî eylediği def‘i meşrû‘a olmamağla iltifât olunmayıp meblağ-ı muhâlün-bih-i mezkûr ik bin dört yüz guruşu vech-i şer‘î üzere müdde‘i-i mezbûra edâ ve teslîme ba‘de’l-hükm ve’t-tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 13 Rebî‘ülâhir sene 1223.