İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 347 Hüküm no: 327 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İstemat v. Mihal’in vârisleri Kaloyani, Polaman ve sairlerinin Duka v. Anaştaş’da olan alacaklarının tahsil olunması 525 guruş hüküm Ma‘rûz Âsitâne-i aliyye’de mütemekkin boyacı esnâfından olup bundan akdem hâlik olan İstemat v. Mihal’in sulbî sagīr oğulları Kaloyani ve Polaman ve sagīre kızları Galini ve Kalini nâm sagīrlerin anaları tesviye-i umûrlarına kıbel-i şer‘den mansûb vasîleri Zaharina bt. Kolmo nâm Nasrâniye tarafından Aslan v. Melaho ve Mihal [v.] Vasiliko nâm zimmîler şehâdetleriyle vekâleti sâbit olan Vasil v. Aleksa nâm zimmî meclis-i şer‘-i enverde esnâf-ı mezkûreden Duka v. Anaştaş muvâcehesinde mersûm Duka zimmetinde müvekkilem mesfûrenin vasiyesi olduğu sagīrûn-ı mersûmûnun babaları mersûm İstemat’dan irsen intikāl eden mâl-ı mevrûslarından bâ-temessük yedimden istikrâz ve ahz ü kabz eylediği beşyüz yirmi beş guruş alacak hakları olmağla vekâletim hasebiyle hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı mezbûr beş yüz yirmi beş guruşu vech-i şer‘î üzere sagīrûn-ı mersûmûnun mâl-ı mevrûslarından olmağın müvekkile-i mesfûre Zaharina nâm Nasrâniye vekîli mersûm Vasil’e edâ ve teslîme mesfûr Duka’ya ba‘de’l-hükm tenbîh olunduğu İstanbul mahkemesinden huzûr-ı [âlîlerine i‘lâm olundu]. Fî 5 Rebî‘ülâhir sene 1223.