İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 348 Hüküm no: 329 Orijinal metin no: [44b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Abdullah’ın, Markos v. Alob aleyhindeki alacak iddiasından men olunması 913 guruşdan ibrâ Ma‘rûz Âsitâne-i aliyye’de Cağaloğlu nâm mahâlde sâkin sâhib-i arzuhâl Osman b. Abdullah Meclis-i şer‘de Markos v. Alob nâm zimmî muvâcehesinde işbu Markos zimmetinde duhân semeninden bin dört yüz elli sekiz guruş on dört para ve müteferrik kimesneler zimmetlerinde alacak haklarımdan yüz bir guruş ve bir def‘a âhar kimesneler zimmetinde alacağım olan iki yüz elli guruşu kendüye havâle etmemle ahz ve bu vechile benden ahz ü kabz eylediği cem‘an bin sekiz yüz on guruş alacak hakkımın sekiz yüz doksan yedi guruşunu ahz edip mâ‘adâ dokuz yüz on üç guruş alacak hakkım olmağla hâlâ taleb ederim deyü ba‘de’d-da‘vâ ve’l-istintâk mersûm Markos cevâbında bin iki yüz yirmi iki senesi Saferi’l-hayrı’nın beşinci günü merkūm Osman ile şühûd mahzarında hesâbımız sahîhan yegân [yegân] rü’yet olunup bir birimizde alacak hakkımız zuhûr etmemekle merkūm Osman benim zimmetimi ibrâ-yı âmm-ı râfi‘ü’l-hısâm ile ibrâ, ben dahi onun zimmetin ibrâ ve her birimiz âharın ibrâsını kabûl edip ve yedime işbu bir kıt‘a temessük i‘tâ eyledi deyü takrîrine muvâfık bir kıt‘a ibrâ temessükü ibrâz eyledikde merkūm Osman tasdîk etmekle bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 16 Rebî‘ülâhir sene 1223.