İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 349 Hüküm no: 330 Orijinal metin no: [44b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Uzunkasap mahallesi imamı Hacı Halil’in, mahallelinin şikâyeti nedeniyle istedikleri kişiye imamlığı devretmeyi taahhüt etmesi İmâmeti kasr-ı yedine ta‘ahhüd Ma‘rûz Âsitâne-i aliyye’de vâki‘ Uzunkasap mahallesi ahâlisinden eşrâf-ı kuzâtdan es-Seyyid Abdurrahman Efendi ve Molla Mehmed Aşkī ve mahalle-i mezbûre müezzini el-Hâc Feyzullah ve Süleyman Ağa ve Ömer Efendi ve Muhyiddin Efendi ve İsmail Efendi ve Ebûbekir Ağa ve Sadullah Ağa ve Ali Efendi ve Osman Efendi ve Çedikçe Mehmed Ağa ve Abdullah Eyüb ve Yunus ve el-Hâc Abdullah ve Mustafa Ağa ve Molla Süleyman ve Seyyid Mustafa Ağa ve es-Seyyid Ahmed Ağa ve Mehmed Ağa ve Sarrâc Mehmed ve sâir bi’l-cümle ahâli-i mahalle-i mezbûre meclis-i şer‘-i münîrde hâlâ mahalle-i mezbûre İmâmı el-Hâc Halil Efendi b. Mustafa muvâcehesinde işbu imâm-ı mezbûr el-Hâc Halil Efendi’nin evzâ‘ ve etvârından hoşnûd ve râzılar değilleriz, dâimâ her birilerimize ta‘zîr mûcib şütûm-ı galîza ile şetm ve ırzımıza müte‘allik kelimât tekellüm ve her dürlü kendüden emn ü rahatımız meslûb ve bi’l-cümle müteneffir ve mütezarrır olmamızla merkūm el-Hâc Halil Efendi’nin üzerinden imâmet-i mezkûre ref‘ ve yerine muhtâr-ı cemâ‘at olan bir mütedeyyin kimesne mahalle-i mezbûreye imâm nasb ü ta‘yîn olunmak murâdımızdır deyü her birileri bi’l-muvâcehe iştikâ etmeleriyle imâm-ı merkūm el-Hâc Halil Efendi dahi kendi hüsn-i rızâ ve ihtiyârıyla muhtâr-ı cemâ‘at olan kimesneye ferâğ etmek üzere ta‘ahhüd ve târih-i i‘lâmdan otuz bir gün tamamına değin muhtâr-ı cemâ‘at olan kimesneye ferâğ ve kasr-ı yed etmez isem üzerimden ref‘ olunsun dedikde ahâli-i mahalle mezbûre bu vechile râzı olmalarıyla minvâl-i muharrer üzere kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 19 Rebî‘ülâhir sene 1223.