İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 350 Hüküm no: 331 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bilecik bt. Agob’un ve kardeşi Karabet’in Dülbendçi mahallesindeki binada ikamet ettikleri katları nöbetleşe kullanmaları Kumkapı’da menzil muhâyâsı Ma‘rûz Âsitâne-i aliyye’de hısnı ebvâbından Kumkapı kurbünde Dülbendçi Câmi‘-i şerîfi nezdinde mütemekkine Bilecik bt. Agob nâm Nasrâniye meclis-i şer‘-i enverde li-ebeveyn er karındaşı Karabet nâm zimmî muvâcehesinde İstanbul’da kâtib Hüsrev Câmi‘-i şerîfi musakkafâtından Kumkapı dâhilinde Dülbendçi mahallesinde kâin ale’l-iştirâki’s-seviyy beher şehr otuzar akçe icâre-i müecceleli bir bâb menzile mutasarrıflar olup on seneden beri menzil-i mezbûrun tabaka-i süflâsında ben mütemekkine olup ve ol dahi tabaka-i ulyâsında kezâlik on sene işbu karındaşım Karabet mütemekkin olup el-hâletü hâzihî muhâyât tarîki ile tabaka-i ulyâda ben mütemekkine olup işbu karındaşım Karabet tabaka-i süflâsında mütemekkin olması matlûbumdur deyü ba‘de’d-da‘vâ ve’l-istintâk mersûm Karabet cevâbında ben tabaka-i ulyâda mütemekkin olduğum hînde ta‘mîr ve termîm eyledim deyü kavl-i mücerredine amel olunmayıp bi’t-terâzî işbu bin iki yüz yirmi üç senesi Cemâziyelûlâsı gurresinden bin iki yüz yirmi dört senesi Rebî‘ülâhiri gāyetine değin mesfûre Bilecik menzil-i merkūmun tabaka-i ulyâsında mütemekkine olup ba‘dehû minvâl-i muharrer üzere muhâyât mütemekkinler olmak üzere kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 18 Rebî‘ülâhir sene 1223.