İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 350 Hüküm no: 332 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karahisarlı Mehmed Ağa’ın, Seyyid Hüseyin ve Seyyid İbrahim Edhem aleyhindeki berber dükkânı gediği iddiasından men olunması Kadırga Limanı’nda berber dükkânı gediği Ma‘rûz Âsitâne-i aliyye’de vâki‘ Kadırga Limanı’nda sâkin sâhib-i arzuhâl Karahisârî Mehmed Ağa b. Halil Çarşamba günü Arz Odası’nda kāimmakām-ı âlî-makām huzûrunda ma‘kūd olan meclis-i şer‘-i enverde es-Seyyid Hüseyin b. el-Hâc Mustafa ve li-ebeveyn er karındaşı es-Seyyid İbrahim Edhem muvâcehelerinde Kadırga Limanı’nda vâki‘ Kolluk civârında kâin bi’l-icâreteyn mutasarrıf oldukları bir bâb berber dükkânı derûnunda mevcûda beyne’l-hıref gedik ta‘bîr olunur âlât-ı lâzıme-i ma‘lûmeyi babaları el-Hâc Mustafa nâm kimesne iki yüz beş senesinde bâ-temessük-i Kirkor zimmîye yüz doksan guruşa bey‘ ba‘dehû mersûm Kirkor zimmî dahi iki yüz sekiz târihinde Bedros zimmîye bey‘, mesfûr Bedros zimmî dahi üç karındaşlar Ağyazar ve diğer Bedros ve Bogos nâm zimmîlere bey‘, mesfûrûn dahi bin iki yüz on sekiz târihinde bana bey‘ etmeleriyle gedik-i merkūm Başmuhâsebe Kalemi’nde mukayyed gediklerden olmağla bu vechile gedik-i merkūma mâlik iken merkūmûn es-Seyyid Hüseyin ve es-Seyyid İbrahim Edhem dükkân-ı merkūmede gediğin yokdur deyü beni dükkân-ı merkūmdan def‘ ü men‘ etmeleriyle merkūmânın te‘addîleri men‘ ü def‘ olunmak murâdımdır deyü ba‘de’d-da‘vâ ve’l-istintâk merkūmân es-Seyyid Hüseyin ve es-Seyyid İbrahim Edhem cevâblarında babamız müteveffâ-yı mezbûr el-Hâc Mustafa Ağa Kadırga Limanı’nda vâki‘ Acı Çeşme ardında kâin Yahya Paşa Vakfı musakkafâtından bi’l-icâreteyn taht-ı tasarrufunda olan bir bâb berber dükkânına mutasarrıf iken fevt olup dükkân-ı merkūm ale’l-iştirâk intikāl-i âdî ile bizlere intikāl eden dükkân-ı mezkûr mârrü’z-zikr Acı Çeşme ardında bi’l-iktizâ mutasarrıfı olan menzili derûna zam ve idhâl eylediği Mustafa Usta dükkânı demekle ma‘rûf Başmuhâsebe’de mukayyed Mustafa Usta dükkânı ittisâlinde olup işbu mezbûr Mehmed Ağa’nın Başmuhâsebe’de mukayyed Bedros dükkânı deyü iddi‘â eylediği dükkânın kaydı câmi‘ karşısında Ahmed Usta dükkânı iltiyânında? mukayyed olmağla bizlerin mutasarrıf olduğumuz dükkânımız sâlifü’z-zikr çeşme ardında menzile idhâl olunan Mustafa Usta dükkânı ittisâlinde olmağla zikr olunan gedik mahâll-i âharda olduğu ve dükkân-ı merkūmda gedik i‘tibârı yokdur deyü bi’l-külliye ba‘de’l-inkâr müdde‘î-i merkūm Mehmed Ağa’ya suâl olundukda eğerçi merkūmânın bi’l-icâreteyn mutasarrıf oldukları dükkân-ı mezbûr menzil-i merkūma idhâl olunan dükkâna muttasıl dükkân olduğunu ikrâr ü i‘tirâf edip lâkin Başmuhâsebe Kalemi’nde hîn-i kaydında sehven kayd olmuşdur dediği kelâmına iltifât olunmayıp ancak dekâkin-i mezkûre gedikleri Başmuhâsebe’de tahdîd olunarak kayd olunmuş olmağla merkūmân es-Seyyid Hüseyin ile es-Seyyid İbrahim Edhem’in bi’l-icâreteyn mutasarrıf oldukları dükkân Bedros dükkânı kaydı olduğu dükkân olmayıp âhar dükkân olduğu kuyûdâtın tahdîdinden ve mezbûr Mehmed Ağa’nın ikrâr ü i‘tirâfından zâhir ve mütebeyyin olmağla merkūm Mehmed Ağa merkūmân es-Seyyid Hüseyin ile es-Seyyid İbrahim Edhem’e bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 15 min-Rebî‘ülâhir sene 1223.