İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 351 Hüküm no: 333 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabasakal Sinan Ağa vakfı Mütevellisi İmam Mehmed Efendi tarafından Karabet’e kiraya verilen arsanın Hamza Bey Vakfı Mütevellisi Mehmed Efendi’ye teslimi Kabasakal’da arsa keşfi Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi Hâssa mi‘mârı hulefâsından Mustafa ve Mehmed Ârif Halîfeler ile derûn-ı arzuhâlde mezkûr İstanbul’da Kabasakal Sinanağa mahallesinde vâki‘ münâza‘un-fîh olan Muhterik menzil arsasına varıp cerîdede mazbûtü’l-esâmî Müslimîn huzûrlarında akd-i meclis-i şer‘ eyledikde nezâret-i dâ‘îlerinde âsûde evkāfdan meş‘aleci Hamza Bey Vakfı’nın mütevellîsi Mehmed Efendi b. Ahmed meclis-i ma‘kūd-ı mezkûrda yine nezâret-i dâ‘îlerinde âsûde evkāfdan Kabasakal Sinanağa Vakfı’nın mütevellîsi İmâm Mehmed Salih Efendi b. Mehmed mahzarında arsa-i mezkûre Kabasakal Sinanağa Vakfı’ndan olmak üzere bi’l-icâreteyn mutasarrıf olan Keresteci Karabet v. Ananya zimmî hâzır olduğu hâlde işbu derûnunda akd-i meclis-i şer‘-i şerîf olunan bir tarafdan mârrü’z-zikr Kabasakal Sinanağa Vakfı’ndan muhterik menzil arsası ve bir tarafdan İmâm meşrûtası gedik arsa ve bir tarafdan Aşçıbaşı Süleyman Ağa Vakfı’ndan müderrisîn-i kirâmdan Hâdimîzâde es-Seyyid Ahmed Efendi tasarrufunda olan gedik arsa ve bir tarafdan tarîk-i âm ile mahdûd tûlen yirmi zirâ‘ ve arzan sekiz zirâ‘ terbî‘an yüz altmış zirâ‘ arsa mütevellîsi olduğum meş‘aleci Hamza Bey Vakfı musakkafâtından ve mezbûr es-Seyyid Ahmed Efendi’nin vekîl-i müseccel-i şer‘îsi Hüseyin b. Ahmed hâzır olduğu hâlde müvekkil-i mezbûrun tasarrufunda iken imâm-ı mezbûr Kabasakal Sinanağa Vakfı musakkafâtından olmak üzere zabt ve hâzır-ı mesfûr Karabet zimmîye îcâr etmekle kasr-ı yedine tenbîh olunmak bi’t-tevliye matlûbumdur deyü ba‘de’d-da‘vâ ve’l-istintâk ve’l-inkâr müdde‘î-i mütevellî-i merkūm Mehmed Efendi ber-vech-i muharrer müdde‘âsını udûlden olup şehâdetleri makbûle olan Hâcegân-ı Dîvân-ı hümâyûndan Ali Efendi b. Ahmed ve el-Hâc Mustafa Ağa b. Hasan ve es-Seyyid Mehmed Ağa b. Abdullah ve Osman Ağa b. Mustafa ve el-Hâc Bektaş Ağa b. Ali ve Ömer Ağa b. Yusuf ve Ali Efendi b. Mustafa nâm kimesneler alâ-tarîki’ş-şehâde haber verdiklerinde imâm-ı mezbûr dahi arsa-i mezkûre Meş‘aleci Hamza Bey Vakfı müsakkafâtından olduğunu tasdîk eylediğini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 19 Rebî‘ülâhir sene 1223.