İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 352 Hüküm no: 334 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Ali Efendi’nin tasarrufunda olan vakıf arsası üzerindeki fırının yanması nedeniyle talebi üzerine fırın gediği kaydının silinmesi Taşkasab’da habbâz fırını Ma‘rûz Rumeli kuzâtı eşrâfından Derviş Ali Efendi b. Abdullah meclis-i şer‘-i münîrde habbâzân tâifesinin kethudâsı Mustafa Ağa ve bi’l-cümle nizâm ustaları hâzır oldukları hâlde takrîr-i kelâm edip İstanbul’da Taşkasab kurbünde Çavuş Mescidi Fırını demekle ma‘rûf bir bâb habbâz fırını bin yüz doksan altı senesinde vukū‘ bulan harîk-i kebîrde muhterik ve arsası sırfe kalıp lâkin arsa-i mezkûre benim bi’l-icâreteyn taht-ı tasarrufumda olup fırın-ı mezkûrun mahâll-i merkūmda lüzûmu olmadığına binâen gedik ashâbı fırın-ı mezkûra merbût olan değirmeni âhara semen-i ma‘lûme bey‘ ve semeninden cânib-i mîrîye olan deynlerini edâ ve fırın-ı mezkûrun ancak kaleminde mukayyed mu‘teber gediğini dahi bâ-hüccet-i şer‘iye müstakıllen bana bey‘ etmeleriyle ben dahi arsa-i mezkûreyi bahçe binâ etmemle gedik-i mezkûre fîmâ-ba‘d amel ve i‘tibâr olunmamak şartıyla kaleminden kaydı ref‘ ü terkīn ve yedime sûret i‘tâ olunması matlûbumdur dedikde istikşâf-ı hâl için hâzırûn-ı mezbûrûn istintâk olundukda onlar dahi cevâblarında fi’l-vâki‘ mahâll-i mezkûrda fırının lüzûmu olmamağla gedik-i mezkûr âhar mahalle nakl olunmayıp ve kaleminden kaydı terkīn ve sûret i‘tâ olunmasına bizler dahi râzılarız dediklerinde gedik-i mezkûrun kaydı ref‘ ü terkīn ve efendi-yi mûmâ-ileyh yedine sûret i‘tâ olunması İstanbul Mahkemesi’nden huzûr-ı âlîlerine i‘lâm olundu. Fî 21 Rebî‘ülâhir sene 1223.