İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 353 Hüküm no: 335 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Usta’nın kiracısı bulunduğu kahvehane dükkânının gedik kaydının yapılmasına dair talebinin kabul olunamayacağı Etpazarı’nda kahve gediği, Ma‘rûz İstanbul’da Etpazarı kurbünde vâki‘ merhûm Bâbüssa‘âdeti’ş-şerîfe Ağası esbak Gazanfer Ağa-yı Atik Vakfı’ndan mukaddemâ iki bâb kahve ve bir bâb tütüncü ve hâlâ bir bâb kebîr kahve dükkânına beher şehr on guruş kirâ ile müstecir olan Mehmed Usta b. Mustafa nâm kimesne meclis-i şer‘-i münîrde dükkân-ı mezkûrun sekiz sehm i‘tibârıyla altı sehmine bâ-temessük-i mütevellî mutasarrıf olan es-Seyyid el-Hâc Ali Ağa b. es-Seyyid Mustafa asâleten ve iki sehmine kezâlik bâ-temessük-i mütevellî mutasarrıf olup bundan akdem vefât eden es-Seyyid Osman b. İbrahim nâm kimesnenin sulbî kebîr oğulları es-Seyyid Halil ve es-Seyyid İbrahim’den merkūm es-Seyyid Halil asâleten ve mezbûr es-Seyyid İbrahim’in kayınpederi ve tarafından husûs-ı âtîde vekîl-i müsbet-i şer‘îsi es-Seyyid Mustafa Alemdar b. es-Seyyid Ebâbekir mahzarlarında dükkân-ı mezkûr işbu târihden on yedi sene mukaddem iki bâb kahve ve bir bâb tütüncü dükkânı iken kahve dükkânının birinde Osman Odabaşı nâm kimesne şehriye üç guruş ve birinde Yusuf Odabaşı nâm kimesne şehriye beş guruş kirâ ile müşâhereten müstecirler olup zikr olunan dükkânlara rağbet verip gedik edip târih-i merkūmda mezbûr Osman Odabaşı dört yüz altmış guruş ve merkūm Yusuf Odabaşı beş yüz doksan guruş ki cem‘an bin elli guruş semen-i makbûza iki bâb kahve dükkânları derûnlarında mevcûde âlât ve eşyâ-yı ma‘lûmelerini bâ-hüccet bana bey‘ eylediklerinde ben dahi mârrü’z-zikr iki bâb kahve dükkânları beynlerinde kâin aklâmda mukayyed olmayan bir bâb tütüncü dükkânını dahi mukaddemâ mutasarrıfı olan kimesneden şehriye iki guruş kirâ ile istîcâr ve ol-vechile taht-ı icâremde olan üç bâb dekâkin-i mezkûreyi mutasarrıfının izniyle hedm ve bir bâb kebîr kahvehâne binâ edip şehriye kirâ-yı kadîmi olan on guruş mutasarrıflarına edâ ve derûnunda mevcûde gedik âlât ve eşyâsı ber-vech-i muharrer yedimde mâl-ı müşterâm iken mutasarrıfları mezbûrûn dükkân-ı mezkûrun gediği mu‘teber değildir deyü müdâhale ve ta‘arruz etmeleriyle müdâhaleleri men‘ ü def‘ olunup gedik-i mezkûr mu‘teber olmak için yedime mühürlü tezkire i‘tâ etmek üzere asîl ve vekîl-i mezbûrûna tenbîh olunmak murâdımdır deyü takrîr-i meşrûhu üzere dükkân-ı mezkûrda müşâhereten müstecir olanlar rağbet verip gedik etdim demeleri hilâf-ı şer‘-i şerîf olduğundan mâ‘adâ gedik nizâmının i‘tibârî bir husûsun devam ve istikrârı zımnında taraf-ı pâdişâhîden i‘tâ olunup aklâmdan birinde mukayyed senedât-ı mu‘tebereye mübtenî olur ise kānûnen mu‘teberâtdan olup mülk ashâbı ve icâreteyn ile müstecir olanların gedik i‘tibâr edip tezkire vermelerine şer‘an ve kānûnen i‘tibâr olunmadığı kendüye tefhîm olunup merkūmdan suâl dahi teveccüh etmediği İstanbul Mahkemesi’nden huzûr-ı âlîlerine i‘lâm olundu. Fî 26 Rebî‘ülevvel sene 1223.