İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 354 Hüküm no: 336 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Dede’nin nakliye bedelinden Ahmed Ağa’da olan alacak davasında anlaşma sağlanması 1300 guruşa sulh Ma‘rûz Mahrûse-i Galata’ya muzâfe kasaba-i Tophâne sâkinlerinden es-Seyyid Mehmed Dede b. Mustafa meclis-i şer‘-i enverde Galata Yağkapanı tüccârından Ahmed Ağa b. Ali muvâcehesinde şerîki Kırımî el-Hâc Ömer Ağa hâzır olduğu hâlde işbu Ahmed Ağa hâzır-ı merkūm el-Hâc Ömer Ağa ile şerîk oldukları hâlde ber-vech-i iştirâk mâlik oldukları Çekdirme ta‘bîr olunur Karaböcekoğlu yedinde olan sefînesine benim kendi malımdan hamûle tahmîl ve Âsitâne-i aliyye’de kendülere îsâl etmek üzere emirleriyle beni İbrail iskelesine irsâl ben dahi iskele-i merkūmeye vusûlümde kendi malımdan sefîne-i mezbûreye şa‘îr ve âhar eşyâ iştirâ ve tahmîl edip cem‘an emirleriyle malımdan altı bin altı yüz yirmi guruş sarf eyledikden sonra şerîki Kırımî işbu el-Hâc Ömer Ağa’nın hissesine isâbet eden üç bin üç yüz on guruşunu tamamen ahz ü kabz edip işbu Ahmed Ağa’dan dahi üç bin üç yüz on bir guruşdan bin yüz yetmiş guruşunu ahz edip meblağ-ı mezbûrdan hâlâ zimmetinde bâkī iki bin yüz kırk guruşu taleb ve da‘vâ eylediğimde ol dahi ba‘de’l-inkâr müdde‘âmı isbât esnâsında iken beynimzde muslihîn tavassut etmekle ber-minvâl-i meşrûh tasaddî eylediğim da‘vâ-yı mezkûrumdan kat‘a li’n-nizâ‘ bin üç yüz guruş üzerine bi’t-terâzî ba‘de’s-sulh ve’l-kabûl meblağ-ı mezbûr bedel-i sulh olan bin üç yüz guruşdan mâ‘adâ sekiz yüz kırk guruşdan mezbûr Ahmed Ağa’nın zimmetini ibrâ-yı âmm-ı sahîh-i şer‘î ile ibrâ ve iskāt-ı hak eyledim dedikde, ol dahi ba‘de’t-tasdîk ibrâdan müstesnâ bedel-i sulh olan meblağ-ı merkūm bin üç yüz guruşun edâsına merkūm Ahmed Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 15 R sene 1223.