İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 358 Hüküm no: 338 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mustafa’nın Hocapaşa Çeşmesi’ne bağlı saka gediğini Osman Beşe’ye kiraya vermesi ve zimmetini ibra etmesi Otuz guruş ve sâirden ibrâ Ma‘rûz Sâhibe-i arzuhâl Âsitâne-i aliyye’de Hocapaşa’da sâkine Ümmügülsüm Hatun bt. Mustafa tarafından es-Seyyid Feyzullah Ağa b. Mustafa ve es-Seyyid Mehmed Ağa b. Hüseyin şehâdetleriyle vekâletleri sâbit olan Mehmed Ağa b. Şa‘bân meclis-i şer‘-i münîrde Hocapaşa Çeşmesi sakaları bölükbaşısı Osman Beşe b. Süleyman mahzarında Emir Câmi‘-i şerîfi Çeşmesi’ne merbût saka gediği ta‘bîr olunur bir kırba ve bir arkalıç âlât-ı lâzımesi olan saka gediğine mutasarrıfe olmam ile işbu Osman Beşe mârrü’z-zikr gediğimi beher şehr yedişer guruşa âhara îcâr edip ancak bana beher şehr birer guruşunu i‘tâ mâ‘adâ altı guruşunu kendisi bi-gayrı hakkın ahz etmekle beş ayda beher şehr altışar guruşdan zimmetinde müctemi‘a olan otuz guruşu hâlâ taleb ederim deyü bi’l-vekâle da‘vâ sadedinde olmuş idim. El-hâletü hâzihî beynimize muslihûn tavassutuyla da‘vâ-yı mezkûrdan gedik-i mezbûre icâresi olmak üzere beher şehr üçer buçuk guruş ve yevmiye üçer kırba mâ-i lezîz müvekkile-i mezbûrenin kendi menziline götürmek üzere inşâ-i akd-i sulh etmeleriyle ben dahi kabûl, minvâl-i meşrûh üzere bi’l-vekâle îcâr ve meblağ-ı mezbûr otuz guruşa ve sâire müte‘allika âmme-i da‘vâdan mezbûr Osman Beşe’nin zimmetini bi’l-vekâle ibrâ, ol dahi ibrâ-yı mezkûru kabûl eyledi dedikde mezbûr Osman Beşe tasdîk edip bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 13 Rebî‘ülâhir sene 1223.