İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 358 Hüküm no: 339 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Beşe’nin Yedikule’deki fırın ve değirmen hissesini Topal Muslı Beşe’ye bir seneliğine kiraya vermesi Yedikule’de habbâz fırını ve değirmen Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden Kel Mustafa b. Süleyman’ın sulbî oğlu Abdi Beşe nâm kimesne meclis-i şer‘-i münîrde arzuhâlde mastûr İstanbul’da Yedikule hâricinde vâki‘ bir bâb habbâz fırını ve ona merbût ittisâlinde kâin altı horoslu bir bâb değirmen derûnunda mevcûde beyne’l-hıref gedik ta‘bîr olunur yirmi dört re’s bârgir ve ona isâbet eden sâir âlât-ı lâzıme-i ma‘lûmeden sekiz re’s bârgir hissesine mutasarrıf olan mezbûr Kel Mustafa ve dört re’s bârgir hissesine mutasarrıf olup derûn-ı arzuhâlde mezkûrü’l-ism Muslı Beşe b. İsmail ve dört re’s bârgir hissesine mutasarrıf olan Hızır Beşe b. İsmail nâm kimesneler ile dört re’s bârgir hissesine mutasarrıf olan Radiç v. Yanko nâm zimmî hâzır oldukları hâlde dört re’s bârgir hissesine mutasarrıf olup kezâlik derûn-ı arzuhâlde mezkûrü’l-ism Topal Muslı Beşe b. Süleyman nâm kimesne mahzarında fırın-ı mezkûr derûnunda hâzırûn-ı merkūmûnun rızâlarıyla işbu sene-i mübârekede dahi mezbûr Topal Muslı Beşe sâkine olmak üzere beynleri tevfîk ve ıslâh olunmağla ben dahi fırın-ı mezkûrda aylakçı olmak üzere taksîmi târih-i i‘lâm senesi rûz-ı Hızır duhûlünden bir sene tamamına değin fırın-ı mezkûrda hizmet etmek üzere dört yüz guruş ücret tesmiyesiyle hâzırûn-ı merkūmûnun rızâlarıyla mezbûr Topal Muslı Beşe’ye îcâr ve teslîm eylediğimde ol dahi ber-vech-i muharrer istîcâr ve kabûl eyledi dediğini mezbûr Muslı Beşe tasdîk eylediği İstanbul Mahkemesi’nden huzûr-ı [âlîlerine i‘lâm olundu]. Fî 15 Rebî‘ülâhir sene 1223.