İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 359 Hüküm no: 340 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Pezer’in tuhafçı ve fincancı dükkânı gediklerini satması Tahtakale’de dükkân Ma‘rûz Hâmiş-i muhâsebede mukayyed tuhafçı ve fincancı gediklerinden olup İstanbul’da Tahtakale kurbünde Katırcı Hanı karşısında kâin Duhâncı dükkânına muttasıl bir bâb dükkân derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin bâ-sûret-i hümâyûn mâliki Perez v. Avram Yahûdî meclis-i şer‘-i münîrde Menahim v. Matatya Yahûdî muvâcehesinde takrîr-i kelâm edip bâlâda mezkûr bir bâb tufahçı ve fincancı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeyi dokuz yüz guruş semen-i makbûza tarafeynden bi’l-îcâb ve’l-kabûl bâtten ve sahîhan mersûm Menahim Yahûdî’ye bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan tuhafçı ve fincancı gediğinde benim kat‘a alâka ve medhalim kalmayıp mersûm Menahim Yahûdî’nin mülk-i müşterâsı olmuşdur dedikde ol dahi tasdîk etmeğin gedik-i mezkûrun kaydı kaleminde bâyi‘-i mersûm Perez Yahûdî üzerinden ref‘ ü ilkā ve müşterî-yi mersûm Menahim Yahûdî üzerine tahrîr ü kayd ve yedine sûret i‘tâ olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 21 R sene 1223.