İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 360 Hüküm no: 341 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çalatca, Silivri, Ereğli, Terkos ve Büyükçekmece ve Küçükçekmece kazalarında küçükbaş hayvan sayımı yapılması Ağnâm mâddesi Ma‘rûz “İşbu takrîr ve derkenâra nazar ve sâbıkına tatbîk ile emr-i âlî ısdârını i‘lâm eyleyesiz” deyü sâdır olan emr-i âlîlerine imtisâlen evvelâ takrîre nazar olundukda öteden beri Çekmece-i sagīr ve kebîr kazâları sâir Silivri ve Ereğli ve Terkos ve Çatalca kazâlarında dâhil olup sayıcılar ma‘rifetiyle ağnâmların ta‘dâd ve mübâya‘aları kadîme olmağla şimdilik mübâya‘aları terk, vakt-i muzâyakada ağnâm lâzım oldukda mübâya‘aların vermek üzere yedlerine emr-i âlî verildiğine binâen bu esnâda ağnâm-ı mîriyenin kılleti olmağla ta‘yînât-ı mîriyeye noksân terettüb eylediğine binâen Çekmece-i kebîrden altı yüz ve sagīrden dört yüz re’s ağnâm yâhûd mevcûd olan ağnâmları şurûtu üzere bi’l-cümle ta‘dâd ve on re’sde bir re’s ganem mübâya‘a ve tahsîl olunması bâbında emr-i âlî sudûrunu hâlâ Kasabbaşı Mustafa Ağa istid‘â eylediğine nazaran ve sâniyen derkenâr olunan emr-i âlînin mefhûm-ı münîfinde Çekmece ve Silivri ve havâlîlerinde olan kasabât ve kurâ Âsitâne-i aliyye’nin kilârı misillü olmağın kuzuları ve südleri ibâdullâhda bulunan ağnâmlarından râyic-i vakt üzre verdikleri esnâda kasabbaşı-yı esbak tarafından ta‘yîn olunan sayıcıları kazâhâ-i mezbûre ahâlileri yedlerinde mevcûd olan gebe ve sağman ve damızlık bahâr koyunlarının on re’sinde bir re’sini otuz dokuzar paraya cebren ve kahren iştirâ derhâl sekizer dokuzar guruşa âhara bey‘ edip kazâhâ-i mezbûre ahâlilerine gadr eyledikleri beyânıyla sâlifü’z-zikr Çekmeceler kazâları ve kurâlarından kat‘a ağnâm iştirâ olunmamak ve Silivri ve Ereğli ve ol havâlîde olan kazâlardan rûz-ı Hızır esnâsında ta‘dâd edip onda bir marya ve toklu ve keçi alıp sağman ve kuzulu ve damızlık ağnâmdan almamak üzere mukaddemâ sâdır olan evâmir-i şerîfe kuyûdâtından müstebân olmağla mukaddemâ sâdır olan evâmir-i aliyye mûceblerince mârrü’z-zikr Çekmeceler kazâları ve kurâlarından kat‘a ağnâm alınmamak ve sâlifü’l-beyân sâir kazâlardan mu‘ahharan gerek gebe ve sağman ve kısır ve toklu ve keçi cümlesi ta‘dâda dikkat olundukdan sonra sağmal ve gebe alınmayıp onların yerine kısır ve toklu ve erkek ve keçi alınmak ve gebelerinin kuzulaması rûz-ı Hızıra değin tekmîl olmağla rûz-ı Hızır’dan sonra gebe kalmayıp mübâya‘asına şürû‘ ve vech-i meşrûh üzere te‘addîleri men‘ olunmak bâbında emr-i âlî sâdır olmağla ber-mûceb-i emr-i âlî Çekmeceler kazâlarından ve kurâlarından kat‘a sayıcılar ta‘dâdıyla ağnâm iştirâ olunmayıp mâ‘adâ Silivri ve Ereğli ve ol havâlîde olan kazâlardan rûz-ı Hızır’dan sonra gebe kalmayıp mübâya‘asına şürû‘la kuzulu sağmaldan alınmayıp yerine kısır ve marya ve toklu ve keçilerinden alıp gebe ve sağmal ve kuzulu ve damızlık ağnâmlarından iştirâ olunmaması bâbında sâbıkına tatbîkan emr-i âlî sudûru iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 25 R sene 1223.