İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 361 Hüküm no: 342 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Yorgi’nin Sava v. Kostanti aleyhindeki havyarcı gediği satışıyla ilgili iddiasının reddedilmesi Ayazmakapısı’nda dükkân Ma‘rûz Derûn-ı arzuhâlde mersûmü’l-ism Kiryako v. Yorgi nâm zimmî meclis-i şer‘-i hatîrde arzuhâl eden Sava v. Kostanti nâm zimmî muvâcehesinde bakkālân pazarbaşısı Süleyman Ağa ve Bölükbaşı es-Seyyid Ahmed ve nizâm ustaları hâzır oldukları hâlde İstanbul’da Ayazma kapısı hâricinde Yemeniciler sûkunda kâin Hacı Mustafa nâm-ı diğer Yeni Dükkân demekle ma‘rûf bir bâb dükkân derûnunda mevcûde beyne’l-esnâf gedik ta‘bîr olunur bir kantar ve bir terâzî ma‘a derâhim ve sekiz fıçı ve sekiz bıçak ve iki küp ve bir pîş-tahta ve bir akçe tahtası ve bir kazgan ve bir tencere ve bir leğen ve sâir âlât-ı lâzımenin yüz yirmi sehm i‘tibârıyla doksan beş sehmi âharın ve yirmi beş sehmi mersûm Sava zimmînin yedinde mülkü iken zimmî-yi mersûm işbu târihden üç sene mukaddem âlât-ı lâzıme-i muharrere-i mezkûrede ber-i‘tibâr-ı merkūm mâlik olduğu yirmi beş sehm hisse-i şâyi‘asını bin yedi yüz yetmiş guruş semen-i medfû‘ ve makbûza bana havyarcı gediği olarak bey‘ ü temlik ve vech-i lâyıkı üzere teslîm eylediğinde ben dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt ve ba‘dehû ben dükkân-ı mezkûrda mütemekkin ve havyar ve balık tuzlayıp ol-vechile ticâret eder iken havyarcı esnâfı dükkân-ı mezkûr bakkāl dükkânı olup havyarcı dükkânı değildir deyü benimle târih-i mezbûrda ba‘de’l-mürâfa‘a ve beni havyar bey‘inden men‘ etmeleriyle âlât-ı lâzıme-i muharrere-i mezkûrede olan ber-i‘tibâr-ı merkūm yirmi beş sehmi alıp semen olmak üzere medfû‘um olan meblağ-ı merkūm bin yedi yüz yetmiş guruşu bana red ve teslîme mersûm Sava zimmîye tenbîh olunmak matlûbumdur deyü ba‘de’d-da‘vâ ve’l-istintâk zimmî-yi mersûm cevâbında gedik-i mezkûrun havyarcı olarak ol-mikdâr guruş semen-i makbûza bey‘ini ikrâr lâkin balık tuzlayıcı dükkânları yirmi dokuz adede münhasır olup ziyâde ihdâs bâ-hatt-ı hümâyûn memnû‘ olduğuna binâen müdde‘î-i mersûm esnâf-ı merkūmûn ile balık tuzlaması husûsu için mürâfa‘a ve ber-mûceb-i hatt-ı hümâyûn müdde‘î-i mersûm ancak balık tuzlamasından men‘ olunup havyar bey‘inden men‘ olunmamışdır deyü hâzırûn-ı merkūmûnun vech-i meşrûh üzere ihbârlarıyla eylediği def‘ini müdde‘î-i mesfûr Kiryako zimmî bi-tamamihi tasdîk ve ikrâr etmeğin mûcebince müdde‘î-i mersûm da‘vâ-yı mezkûresiyle mesfûr Sava zimmîye bî-vech-i şer‘î mu‘ârazadan men‘ olunduğu tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 21 R sene 1223.