İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 362 Hüküm no: 343 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed’in Sarıgez’deki kasap dükkânı gediği hissesini Mehmed b. Hasan’a satması Sarıgez’de kasab Ma‘rûz Hudâvendigâr-ı sâbık cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden beşinci salhâneye merbût kasab dükkânlarından zikri âtî kasab dükkânı gediği olan âlât-ı lâzıme-i ma‘lûmelerin bâ-temessük-i mütevellî nısf hisse-i şâyi‘asına mutasarrıf olan es-Seyyid Ahmed b. Mehmed meclis-i şer‘-i münîrde Hâssa Kasabbaşısı izzetlü Mustafa Ağa tarafından mürsel kasablar kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâisü’l-i‘lâm Mehmed b. Hasan mahzarında takrîr-i kelâm edip İstanbul’da Sarıgez nâm mahâlde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur ber-vech-i muharrer mutasarrıf olduğum nısf hisse-i şâyi‘amı hüsn-ı rızâmla bedel-i ma‘lûm ve makbûz mukābelesinde bâ-re’y-i mütevellî merkūm Mehmed’e ferâğ-ı kat‘î-i mu‘tebere ile ferâğ ve tefvîz etdiğimde ol dahi ber-vech-i muharrer tefevvüz ve kabûl edip ba‘de’l-yevm âlât-ı lâzıme-i merkūmenin nısf-ı şâyi‘i merkūm Mehmed’in hakk-ı müfevvezi olup benim kat‘a alâka ve medhalim kalmamışdır dedikde merkūm Mehmed dahi ba‘de’t-tasdîk nısf âlât-ı mezkûre fâriğ-i merkūm es-Seyyid Ahmed’in ferâğından kendi üzerine tahrîr ve defter-i vakf-ı şerîfe kayd ve yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî 19 Rebî‘ülâhir sene 1223.