İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 367 Hüküm no: 349 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a taşradan gelen keten ve ona ait mamulatın satılacağı mahaller Bahçekapısı’nda kârgîr Mahzenli dükkânlarda keten ve ona müte‘allik eşyâ bey‘ eden esnâf Ma‘rûz “Derkenâr ve istid‘âya nazaran muktezâsını i‘lâm eyleyesin” deyü bu dâ‘îlerine hitâben sâdır olan fermân-ı âlîlerine imtisâlen İstanbul’da Bahçekapısı kurbünde vâki‘ merhûme ve mağfûrun-lehâ Vâlide Sultan -tâbe serâhâ- evkāfından Sûk-ı cedîdde kâin kârgîr mahzenli dükkânlarda keten ve ketene müte‘allik eşyâ-yı sâire bey‘ eden esnâfın kethudâsı Süleyman Ağa ve Yiğitbaşı Mehmed Ağa ve esnâfından Mehmed Ağa ve Ahmed Ağa ve es-Seyyid Hüseyin Ağa ve Yazıcı el-Hâc Hüseyin ve sâirleri meclis-i şer‘-i münîrde her biri takrîr-i kelâm edip hâmiş-i arzuhâlde mastûr Haremeyn-i şerîfeyn Muhâsebesi’nden muhrec derkenâr ve işbu yedimizde olan bâlâsı mübârek hatt-ı hümâyûn-ı şevket-makrûn ile müzeyyen bir kıt‘a fermân-ı âlî-şân nâtık olduğu üzere mâ-tekaddemden beri Âsitâne-i aliyye’ye vürûd eden keten ve ona müte‘allik emti‘a-i sâirenin resm-i gümrükleri edâ olundukdan sonra bir dirhemi taşra ve mahâll-i âhara nakl olunmayıp doğru çarşı-yı mezkûre nakl olunup bâyi‘ ve müşteri beyninde bi’t-terâzî kat‘-ı pazar ve ba‘dehû ibâdullâha mu‘tedil bahâ ile narh-ı cârîsi üzere çarşı-yı mezkûrda ve medîne-i Üsküdar’da Büyük Köprübaşı nâm mahâlde kahve ve duhâncı dükkânları beynlerinde vâki‘ bir aded ve Yeni Câmi‘-i şerîfe kurbünde Sebilkarşısı’nda Salhâne ve duhâncı dükkânı beynlerinde kâin iki aded ki cem‘an üç aded ketenci dükkânlarında bey‘ edip hâric mağazalarda ve Odunkapısı ve mahâll-i sâirede bey‘ olunmamak ve eğer bir takrîb çarşı-yı mezkûrdan hâric mahalle nakl olunur ise nakleden hamallar ve kethudâları ahz ve tedîb olunması için bâlâsı fermân ve sahh-ı âlî ile müveşşah bir kıt‘a i‘lâm dahi yedimize i‘tâ olunmuşdur deyü mazmûnları min-külli’l-vücûh takrîrlerine mutâbık fermân-ı âlî ve i‘lâm-ı şer‘iye ibrâzıyla fîmâ-ba‘d kadîmi üzere taşradan vürûd eden keten ve ona müte‘allik emti‘a-i sâirenin resm-i gümrükleri ba‘de’l-edâ gümrük emîni ağalar ma‘rifetleriyle doğru çarşı-yı mezkûra nakl olunup bir takrîb hilâf-ı şurût-ı nizâm ve mugāyir-i de’b-i kadîm mahâll-i âhara nakl olunur ise nakleden hamallar ve kethudaları tedîb olunmak üzere yedimizde olan emr-i âlî-şân-ı mezkûrun bi’l-cümle şerâitini dercle tecdîden yedimize bâlâsı tuğrâ-yı garrâ-yı cihân-dârî ile müveşşah fermân-ı âlîleri sudûrunu istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 15 min-Rebî‘ülâhir sene 1233.