İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 368 Hüküm no: 350 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Ömer’in Ketenci Hasan Ağa’da olan alacağının tahsil olunması 250 guruşa sulh Ma‘rûz Sâhibe-i arzuhâl mu‘arrefetü’z-zât Rabia bt. Ömer nâm hatun meclis-i şer‘-i münîrde derûn-ı arzuhâlde mezkûrü’l-ism Ketânî Hasan Ağa b. İbrahim nâm kimesne muvâcehesinde mezbûr Hasan Ağa zimmetinde cihet-i karzdan beş yüz guruşdan bâkī dört yüz eli guruş alacak hakkım olmağla meblağ-ı bâkī-i merkūmu mezbûr Hasan Ağa’dan taleb ederim deyü tasaddî eylediğim da‘vâmdan bâ-vesâtet-i muslihîn mezbûr Hasan Ağa ile bi’t-tav‘ ve’r-rızâ iki yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ dört yüz eli guruşa varınca ziyâdesi olan iki yüz guruşa ve sâire cemî‘ hukūk-ı şer‘iyeye müte‘allika âmme-i de‘âvîden mezbûr Hasan Ağa’nın zimmetini, ol dahi benden seneteyn-i ma‘lûmede bilâ-devr murâbaha nâmıyla verdim deyü iddi‘â eylediği üç yüz otuz dört guruşa ve sâireye müte‘allika âmme-i de‘âvîden benim zimmetimi her birimiz ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde mıkırra-i mezbûre Rabia Hatun’un bi’l-cümle takrîr-i meşrûhasını mezbûr Hasan Ağa tahkīk ve tasdîk ve ber-minvâl-i muharrer kabûlü hâvî ibrâ eylediğini ve ibrâdan müstesnâ bedel-i sulh-ı merkūm iki yüz elli guruş zimmetinde müdde‘iye-i mezbûre Rabia Hatun’a sahîhan deyni olduğunu bi-tamamihi tâyi‘an ve kat‘iyyen ikrâr ü i‘tirâf etmeğin alâ-mûcebi i‘tirâfihî bedel-i sulh-ı merkūm iki yüz elli guruşun müdde‘iye-i mezbûre Rabia Hatun’a edâ ve teslîmiyle mezbûr Hasan Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu]. Fî 24 Rebî‘ülâhir sene 1223.