İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 369 Hüküm no: 352 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuhafçı ve Fincancı esnafının esnaflıktan çıkarılmasını istediği iki şahsın kendi işleriyle uğraşacaklarına dair taahhütte bulunmaları Kendi hâlinde olup kesbiyle meşgūl olmağa ta‘ahhüd, Ma‘rûz Âsitâne-i aliyye’de vâki‘ tuhafçı ve fincancı esnâfının kethudâsı Mehmed Emin Ağa ve ustabaşıları Mesrop v. Anton ve esnâfından Aci Manuk ve Aci Ohannes ve Vartan ve Morsis nâm zimmîler ile dellâlları Menteş v. Avram Yahûdî ve sâirleri meclis-i şer‘-i hatîrde yine esnâf-ı merkūmeden Memacan v. Ohannes ve Artin v. Morsis nâm zimmîler muvâcehelerinde mersûmân esnâfımızdan olup lâkin ırzlarıyla mukayyed ve kâr [ü] kisbleriyle meşgūller olmayıp dâimâ bizleri ta‘cîz ve tekdîr ve nizâm ve intizâmımızın hilâfı hareket eylediklerinden mersûmânı esnâfımızdan tard ve teb‘îd ile tedîb olunmalarını murâd eylediğimizde beynimizde muslihûn tavassutuyla mersûmân ba‘de’l-yevm ırzlarıyla mukayyed ve kâr ü kisbleriyle meşgūller olup hilâf-ı şurût-ı nizâm vaz‘ u hareket etmemek üzere ta‘ahhüd ve eğer hilâf-ı ta‘ahhüd hareketleri zuhûra gelir ise iktizâ eden tedîbât-ı lâyıkalarının icrâsına râzılar olup bizler dahi bu vechile şikâyetlerimizi tehîr eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 15 Rebî‘ülâhir sene 1223.