İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 369 Hüküm no: 353 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav esnafının ileri gelenlerinin Halil b. Mehmed Yazıcı’nın esnaflıktan çıkarılmalarını istedikleri Esnâfdan hurûc iltimâsı Ma‘rûz Âsitâne-i aliyye’de vâki‘ Manav esnâfının pazarbaşısı vekîli Mehmed Emin Ağa ve yiğitbaşı Odunkapılı Hafız Ahmed ve müsinn ü ihtiyâr ustalarından kumkapılı Yusuf ve Manav es-Seyyid Ömer Ağa ve Hüsnü Ağa ve Yemiş İskeleli Hüseyin Yazıcı ve es-Seyyid Veliyüddin ve iskele yiğitbaşısı Molla Mustafa ve Süleyman Beşe ve Osman Ağa ve es-Seyyid Süleyman Beşe ve es-Seyyid İbrahim ve Memiş Alemdar ve el-Hâc Mustafa ve Kara Mehmed ve es-Seyyid Ali ve sâirleri meclis-i şer‘-i münîrde Halil b. Mehmed Yazıcı muvâcehesinde merkūm Halil Beşe esnâfımızdan olup lâkin kendi hâlinde ırzıyla mukayyed ve kâr ü kisbiyle meşgūl olmayıp Lonca Odamıza ve ihtiyârlarımıza itâ‘at etmeyip dâimâ nizâm-ı kadîmimizin mugāyiri harekât-ı nâ-bercâya ibtidâr ve şirâze-i nizâmımızın ihtilâline bâdî olduğu âşikâr olmağla merkūmun bu makūle ihtilâl-i nizâm-ı kadîmi mûcib harekât-ı nâ-marzıyesinden cümlemizin emn ü rahatımız meslûb olmağla kendüden bir vechile hoşnûd ve râzı değilleriz deyü cümlesi bi’l-ittifâk muvâcehesinde iştirâ ve esnâf-ı mezbûrdan hurûcunu bi-ecma‘ihim iltimâs ve istid‘â eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 13 R sene 1223.