İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 370 Hüküm no: 354 Orijinal metin no: [48a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tayyibe bt. Mehmed’in Abdullah Ağa’da olan alacağının tahsil olunması 200 guruşun edâsıyla ilzâm Ma‘rûz Sâhibe-i arzuhâl mu‘arrefetü’z-zât Tayyibe bt. Mehmed nâm hatun meclis-i şer‘-i münîrde hâlâ zevci derûn-ı arzuhâlde mezkûrü’l-ism el-Hâc Abdullah Ağa b. Hasan nâm kimesne muvâcehesinde zevcim mezbûr zimmetinde cihet-i karzdan iki yüz guruş alacak hakkım olmağla meblağ-ı merkūmu zevcim mezbûrdan taleb ederim deyü da‘vâ ol dahi ber-vech-i muharrer ikrâr ü i‘tirâf etmeğin alâ-mûcebi i‘tirâfihî meblağ-ı merkūm iki yüz guruşun müdde‘iye-i mezbûre Tayyibe Hatun’a edâsıyla merkūm el-Hâc Abdullah Ağa ilzâm olunduğu tescîl ve İstanbul Mahkemesi’nden huzûr-ı âlîlerine i‘lâm olundu. Fî 15 min-Rebî‘ülâhir sene 1223.