İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 370 Hüküm no: 355 Orijinal metin no: [48a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaşıkçılar Hanı’nda İngiltere tüccarından Simit’in odasının açılıp dükkânın sahibine teslimi Oda küşâdı Ma‘rûz Danimarka maslahatgüzârının Bâb-ı âlî’ye takdîm eylediği takrîri bâlâsına bu dâ‘îlerine hitâben sâdır olan fermân-ı âlîlerine imtisâlen kıbel-i şer‘den mürsel kâtib-i sânî Merhabâzâde Mahmud Efendi dâ‘îleri bu husûsa memûr Hâcegân-ı Dîvân-ı hümâyûn’dan Hasan Ferdi Efendi ile İstanbul’da Mahmudpaşa kurbünde Kaşıkçılar Hanı fevkānîsinde kâin bir bâb odada İngiltere tüccârından Simit nâm bâzergân müşâhereten müstecir olup oda-i mezkûre mukaddemâ bâ-fermân-ı âlî ma‘rifet-i şer‘ ve Efendi-yi mûmâ-ileyh ma‘rifetiyle temhîr olunmağla bu def‘a cerîdede mazbûtü’l-esâmî Müslimîn ile oda-i mezkûre feth ü küşâd ve derûnunda mevcûde bir demir sandık ve iki sandalye ve bir kutu derûnunda hırdavat ve bir tahta sofra iskemleli, sâhib-i takrîrin münâsib gördüğü mahrûse-i Galata’da Katarât Bâzargânın mağazasına nakl birle teslîm ve oda-i mezkûreyi tahliye ve sâhibesi Katerina Nasrâniyeye teslîm eylediğini kâtib-i mezbûr dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu]. Fî 28 min-R sene 1223.