İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 371 Hüküm no: 356 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Marko’nun alacak talebiyle Osman Ağa’yı taciz etmekten men olunması 608 guruş mu‘ârazadan men‘ Ma‘rûz Derûn-ı arzuhâlde mersûmü’l-ism Nikola v. Marko nâm zimmî meclis-i şer‘-i hatîrde sâhib-i arzuhâl medîne-i Üsküdar’da Kıvırcık Mandıra demekle meşhûr mandıranın sâbıkā kethudâsı Hâssa Hasekilerinden Osman Ağa b. Mehmed nâm kimesne muvâcehesinde ben bundan akdem işbu hâzır bi’l-meclis es-Seyyid Ali Yazıcı b. Halil ile manavlık ticâretinde şerîk olup mâl-ı şirketimizden kethudâ-yı mezbûr Osman Ağa’ya peynir iştirâ etmek için verdiğimiz ma‘lûmül-mikdâr mebâliğin hesâbını rü’yet ve her birimiz ahz ü kabz edip mâl-ı şirketden mezbûr Osman’ın yed ve zimmetinde bir akçe ve bir habbe bâkī kalmayıp lâkin ben kendi malımdan müstakıllen peynir iştirâ etmek için mezbûr Osman Ağa’ya altı yüz sekiz guruş verip ol dahi ahz ü kabz ve meblağ-ı merkūmu yâhûd mukābelesinde peynir vermeyip yedinde kalmağla meblağ-ı merkūm altı yüz sekiz guruşu mezbûr Osman Ağa’dan taleb ederim deyü da‘vâ etdikde, ol dahi cevâbında müdde‘î- mersûmdan meblağ-ı merkūm altı yüz sekiz guruşu kabzını inkârından mâ‘adâ târih-i i‘lâmdan üç gün mukaddem müdde‘î-i zimmî-yi mersûm Nikola zimmî meblağ-ı merkūm altı yüz sekiz guruş müdde‘âsından meccânen fâriğ olup bi’l-cümle husûs-ı mezkûra ve hukūk-ı sâire-i şer‘iyeye müte‘allika âmme-i de‘âvîden benim zimmetimi kabûlümü hâvî ibrâ ve iskāt etmiş idi deyü eylediği ibrâ müdde‘âsını udûlden Pazarbaşı Vekîli Mehmed Emin Ağa b. İbrahim ve es-Seyyid Hasan Ağa b. Osman nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i mersûm Nikola zimmî da‘vâ-yı mezkûresiyle mezbûr Osman Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 21 Rebî‘ülâhir sene 1223.